Japan an chak nghal

Olympic mipa football-a an match hmasa berah Japan-in hnehna an chang nghal a, kum 20 mi winger Takefusa Kubo goal hmangin South Africa chu 1-0 in an hneh.

Team pahnih hi goal khung loin an ṭin mai dawn niin a lang hman a, mahse, Kubo hian minute 70-naah inkhela goal awmchhun hi a khung - Japan rawlthar beiseiawm tan goal hlu bik a ni.

Real Madrid player Kubo hi Japanese mipuiten an ram football superstar ni leh tura an beisei a ni a, kum 2019 khan Real hi a pan. Mahse, Madrid khaw club tan a la khel rih lo a, Real Mallorca, Villarreal leh Getafe-ah te loan-in a khel tawh thung.

Japan hi an captain tawnhriat nei ṭha, Sampdoria defender Maya Yoshida hoa khel an ni a, Olympic an thlen kumah football-a gold lak ngei an tum ruh hle.

South Africa-ah hian Luther Singh chu bul ṭantu zingah a tel a, kum 23 mi forward hi Indian thisen kai niin Portuguese top flight club Paços de Ferreira tan a khel mek.

Group A-ah hian Japan leh South Africa bakah Mexico leh France an awm tel a, a sang pahnih chauhin knockout stage an luh dawn avangin South Africa tan chuan hmabak a ko ta hle.