France hnehtu Mexico

France chuan kum 25 hnua a vawi khat nan Olympic mipa football an khel ve leh a, beisei erawh an phak lo nghal. Nimin khan Les Bleus hian an group match hmasa ber atan Mexico an hmachhawn a, 4-1 in an tlawm.

Mexico tan hian Alexis Vega (47'), Sebastian Cordova (55'), Uriel Antuna (80') leh Eduardo Aguirre (90+1') ten goal khat ṭheuh an khung a, France tana veteran striker Andre-Pierre Gignac-a penalty (69') chhuih luihin awmzia a nei lo.

Ram pahnih hi Olympic bikah chuan vawi li an intawnna a ni, an intawn hmasak pathumah France hi an chak vek - tun ṭumah pawh hian rinkai zawk ni mah se thawnthu a danglam chiang ta hle.

France hian an group match-ah South Africa leh inelna thlengtu Japan te an la hmachhawn leh dawn, an inkhelh kual vek hnuah a sang pahnihin knock out stage an lut ang.