Lalremsiami Hmar awmna India inlan hun

Tokyo Olympic 2020 neih laiah India tan Lalremsiami Hmar a feh chhuak. Mizo nula awmna India hmeichhe hockey team chuan vawiin tlai dar 5:15 hian an group match hmasa ber atan Netherlands an hmachhawn ang.

Oi Hockey Stadium-a inkhel hi Mizoram aṭangin live in a en theih dawn. Sony Sports channel hrang hrangah pek chhuah a ni ang - inkharkhip lai ni mah se mahni in lum aṭangin Mizo nulain Olympic a khel lai a en theih dawn tihna a ni.

A harsa dawn
Hockey hi India infiamna ngaihsan leh a hming ṭhat tawh ṭhinna a ni. Mahse, kum 36 chhung zet mai chu India nula ten Olympic an khel phak loh hnuin Rio Olympic 2016 ah khan an tling ve leh chiah a, beisei erawh an phak lo zui.

A zawna a vawi khat nan Olympic khel turin an tling. Tokyo Olympic khel tur hian playoff-ah team tha leh rinkai zawk United States an hneh thei a, inrintawkna sang tak an neih phah ngei ang tih a chiang.

Olympic khel phak chin erawh a ṭha zual ram 12 chauh an ni tawh. India hi world number 10 an ni phak chauh, zanina an khingpui tur Netherlands hi world number 1 an ni thung - ranking en mai chuan India tan hna a hautak dawn hle.

Mahse, India hian Olympic hma hian 2016 Asian Champions Trophy leh 2017 Asia Cup an la. 2018 Asian Games-ah silver medal lain, a vawi khat nan 2018 Women’s World Cup-ah quarterfinal an thleng bawk, chak turin beisei an nei ngam ang.

An fimkhur dawn
India coach Sjoerd Marijne chuan, "Team enkawl hna ka thawh aṭanga kan thil tum lian ber chu Olympic hi a ni a, tunah chuan a takin kan hmachhawn dawn ta. Inelna hi nikuma neih tur ang khan inbuatsaihna kan nei hman.

"Mahse, kum khatin an sawn tlai a, inbuatsaihna rei leh ṭha zawk kan neih theih phah tihna a ni. Team ṭha vek kan inkhel dawn, a awmzia chu keini pawh team ṭha kan ni tihna a ni a, fimkhur tak chungin chak kan tum ang," a ti.

India captain Rani Rampal pawhin beisei a neih thu sawiin, "Hetianga inelna lian hmachhawn tur hian theihna kan nei sang ve tawk. Player zawng zawngin an mawhphurhna an hre vek, kan theihna tak pho chhuahna hun a ni dawn," tiin a sawi.

Netherlands nen an inhmachhawn zawh hian Germany, Great Britain, Ireland leh South Africa te an la hmachhawn leh dawn a. An group aṭangin pali an tlang dawn a, quarterfinal chinah erawh knockout a ni tawh ang.

Olympic meuh chu a boruak a danglam, keini ang tan chuan engkim mai kha a ropui. Chutih rualin ram dangte el phak turin theihtawp kan chhuah ang. A bul ṭan ṭhat kan tum dawn, harsa mah se kan zam bik dawn lo. Mizo mipuiten min ṭawngṭaipui tawh ṭhin a, ka tan chuan chakna a ni - tun ṭumah pawh hian min ṭawngṭaipuina ka ngen. Rilru leh taksa lamah theihtawpin inbuatsaih tawh mah ila Pathian puihna kan mamawh."
- Remsiami

Siami leh Rani
India coach Sjoerd Marijne-a'n Mizo nula Lalremsiami Hmar lakah beiseina a nei sang hle. Remsiami hi India captain Rani Rampal nen tlarhmaah an inkawp a, India innghahna an ni. Rani leh Remsiami inkawp rem hi team tan a pawimawh, chuvangin khelmual chhung bakah a pawn lam thlenga an inkawm ngeih pawh a ngai - hei vang hian an zin chhuah pawhin pindan (room) pakhatah an dah dun ṭhin.

Tokyo-ah pawh Rani leh Remsiami hi pindan pakhatah an awm. Siami chuan, "Rani hian tawnhriat a nei ṭha a, player ṭha bik a ni bawk. Ani hnen aṭang hian thil tam tak ka zir chhuak, thu ṭha min hrilh hnem thei hle," tiin Vanglaini a hrilh. Kum 26 mi Rani hian India tan match 241 a khelh aṭangin goal 118 a khung, tuna India squad-ah ani aia khung hnem an awm lo. Remsiami hian ram tan match 64 a khelh aṭangin goal 22 a khung ve tawh bawk, kum 21 mi chauh a la ni tih hria ila.

Ka pa tan Olympic
India hmeichhe hockey team hian Tokyo Olympic khel tura an zinkawng pawimawh takah 2019 June thla khan Japan an tlawh a, a thlengtu Japan hi final-ah 3-1 in an hneh - an zin chhuah ṭum hian Lalremsiami Hmar hi India tan player pawimawh a ni.

Inelna neih laklawh laiin Remsiami pa Lalthansanga chu an chenna Kolasib-ah a thi, a pa ruang pawh kil thei loin inelna a hmachhawn zui a, ram tan hlawhtlinna a chan chu a pa tan a hlan zui. Remsiami chuan, "Ka pa khan van aṭangin ka inkhel hi min lo en ve ang a, min chhuang ve ṭhin ngawtin ka ring. Engtik niah emaw chuan Olympic ka khelh ve ngei hi ka beiseiin duhthu kan sam ṭhin. "Tuna Olympic ka khel lai hi min hmu ve hman se tih hi ka duhthusam a ni, mahse a rem tawh si lo. Infiamna khawmpui lian ka khelh hi tun dinhmun ka thlen nana min chawi tleitu ka pa tan ka hlan," tiin a sawi.

MOA-in duhsakna hlan
Mizoram Olympic Association chuan Tokyo Olympic Games-a India tana feh chhuak Lalremsiami Hmar hnenah Rs 3,00,000 a pe. MOA general secretary C. Laltlanthanga chuan, "Lalremsiami Hmar hian Asian Games leh Youth Olympic Games 2018 ah te Silver Medal a lo la ve ve tawh a, Zofate nasa taka chawimawitu a ni. MOA chuan Tokyo 2020-ah hian hlawhtlinna sang tak nen lo haw turin duhsakna sang ber kan hlan e," tiin a sawi.

Inelna Kalphung
• Inkhelh hmain ṭhum an vawr ang, a vannei zawkin ball emaw ṭan hmasakna tur lam an thlang ang.
• Goal khung tam zawk an chak, group stage chinah chuan inhnehtawk a awm thei. Quarterfinal chinah erawh penalty shootout a awm ang.
• Match khat hi quarter paliah ṭhen a ni, quarter khat hi minute 15 zel. Quarter khat inkarah minute hnih chawlh an nei, half time-ah erawh minute nga an chawl dawn.
• Player 11-in bul an ṭan a, keeper chauhin a taksa hmangin ball a tawk thiang. Player thlak zat bituk a awm lo, duh zat zat a thlak theih.
• Goal line aṭangin 14.63m a zau rinkual a awm, hei hi 'striking circle' a ni - hemi chhung aṭang chauh hian a vuak goal theih.
• Player-in a foul chuan lehlamin 'Free Hit' an hmu, ball an vuak dawn hian an khingpui player kha 5m aia hnaiah an awm thei lo.
• Mahni lam goal line bula ball tih chhuah palh chuan lehlam pawlin 'Long Corner' an hmu thei, 23m a hla aṭangin an vua ang.
• Striking circle chhungah goal khung ngei tur ni lem loah foul a awm chuan 'Penalty Corner' an chawi ṭhin.
• Striking circle chhungah goal khung theih ngeina tur anga foul a awm chuan penalty pek theih a ni.
• Green card hmu chu minute
hnih hrem lailawk theih, yellow card hmu chu a tlem berah minute nga hrem tur. Red card an hmu a nih chuan an khel zawm ve thei tawh lo.

Ram 12 inlanna
Olympic hmeichhe hockey inelna hmachhawn tur hian khawmualpui hrang hrang panga champion - Asian Games (Japan), Pan American Games (Argentina), African Olympic Qualifier (South Africa), Euro Hockey Championship (Netherlands) leh Oceania Cup (New Zealand) te an tling nghal.

Japan hi a thlengtu an nih avangin an tling sa, Asia champion an nih bawk avangin FIH Olympic Qualifier aṭanga team lut tur chu pakhatin a pun belh - Australia, China, Germany, Great Britain, India, Ireland leh Spain te an in vaw tling ve leh. Ram inlan 12 hi group pahnihah ṭhen hran an ni a, an inkhelh kual vek hnuah group pakhat aṭanga a sang pali ten quarterfinal an lut ang. India hi Group A-ah Germany, Great Britain, Ireland, Netherlands leh South Africa te nen an awm khawm.