Olympic Games Tokyo 2020 an hawng ta

India aiawh player 22-in kawng zawh
Tokyo Olympic 2020-ah India chuan infiammi 228 a tir chhuak a, nimin tlaia a hawnna kawng zawhah erawh mi 22 bakah official mi paruk chiah an inlan - Indian Olympic Association (IOA) thutlukna siam a ni. India hnam puanzar (flag) chu world champion vawi ruk ni tawh MC Mary Kom leh mipa hockey team captain Manpreet Singh ten an rawn keng a, infiammi an tel tam loh chhan hi vawiin a inelna hmachhawn nghal tur an tam vang niin, hahchawlhna hun an mamawh.

Mipa leh hmeichhe hockey team ten vawiinah match an nei a, captain Manpreet erawh a tira ruatsa a lo nih tawh angin a mawhphurhna a chelh tlang - Olympic kharna kawng zawhah erawh wrestler Bajrang Punia chu flag kengtu a ni tawh ang. Hawnna kawng zawhah hian flag kengtu pahnih bakah Hockey (player 1), Boxing (8), Table Tennis (4), Rowing (2), Gymnastics (1), Swimming (1), Sailing (4), Fencing (1) leh Officials (6) te an inlan a ni.

Nimin tlaia hawnna inkhawmah hian ram hrang hrang a indawtin an inlan a, hun a duh rei avangin Japan ramah chuan zanlai an thleng hial. Vawiina infiamna hmachhawn leh nghal tur tan chuan mutna hun a thlem phah thei - kawngzawh a tel ai chuan hahdam taka mut kha an mamawh. Mizo nula Lalremsiami Hmar telna hmeichhe hockey team pawhin vawiin tlai hian Netherlands an hmachhawn dawn, match an neih dawn avangin Mizo nula hi hawnna kawng zawhah hian a inlan tel ve lo a ni.

Hrang mah se an mal lo
Covid-19 vangin infiammi ṭhahnem tak inkhung hrang chungin training neih a ngai. Heti chung hian infiammite hian beiseina an nei reng a, tumruhna an nei reng bawk tih chu lemchan hmangin an lantir.

Tokyo 1964
Opening Ceremony-a Olympic Ring siam nan hian Tokyo-in Olympic a thlen hnuhnun ber kum 1964-a ram dang infiammite ken thing kung chi an kui ṭiah aṭanga siam a ni.

A hmasa berah Greece
Olympic ṭanna ram Greece-in Opening ceremony-ah hma an hruai a, ram dang hi Japanese ṭawng Gojuon-a an hming indawh danin an kal. Ram 205 zingah India chu 21-naah an kal a, a tawp khartute chu 2028 thlengtu tur United States, 2024 thlengtu tur France leh tun ṭuma thlengtu Japan te an ni.