Spurs-ah Son-a cham dawn

Tottenham Hotspur forward Son Heung-min chuan London club-a cham chhunzawm zel turin thutlukna a siam a, kum li dang Spurs jersey hak chhunzawm turin nimin khan contract thar a ziak.

Kum 29 mi forward hian Spurs tan inelna hrang hrangah match 280 khelin goal 107 a khung a, assist vawi 64 a nei tawh bawk - Spurs tan chuan contract thar a ziak duh hi thawk huaina tham a ni ang.

Season hman zawh taka Spurs tan inelna hrang hranga match 51 a khelh aṭanga goal 22 khunga assist vawi 17 neitu Son chuan, "Thutlukna siam harsa a ni lo. He hmunah hian ka hlim em em a, fan-te hmuh leh hlan ka nghakhlel tawh a ni," a ti.

Bayer Leverkusen aṭanga kum 2015-a Spurs zawmtu Son chuan sawi chhunzawmin, "He club-a kum ruk zet ka khel thei ringawt pawh hi chawimawina ropui tak a tling a, he club hian duat leh zah taka min enkawl avangin he hmuna cham hi ka tan chuan a nuam a ni," a ti a, khaw dang a hawi lo.

Tottenham football managing director Fabio Paratici chuan, "He club tana Son-a ṭangkaizia chu mi zawng zawngin an hmu vek a, kan hma huna kan thil tumte tih hlawhtlinna kawnga a tel zel tur hi kan lawm a ni," tiin a sawi.

Bayern Munich nena sawizawm hlawh hman Son hian Spurs-ah kar khatah £150,000 a hlawh mek nia sawi a ni a, contract thar a ziah takah chuan a hlawh hi pung ngei tura ngaih a ni.

Spurs hian Atalanta defender Cristian Romero chu pound maktaduai 47-in an lalut hnai bawk a, Italian football journalist lar Fabrizio Romano-a sawi danin an inrem thuai a beiseiawm - he thuziak i chhiar meuh chuan an inrem tawh hial mai thei.

Hetihrual hian Harry Kane dinhmun erawh a la chiang thei lo a, English striker hi Manchester City chuan pound maktaduai 160 thleng pawhin an ngam nia sawi a ni a, City hi a pan chuan kar khatah £400,000 a hlawh dawn nia sawi a ni bawk!