Everton-ah Gray Inrenchem taka team din tum Benitez?

Rafael Benitez hnuaia an player pathumna Everton-in an lei leh ta a, a hming chu Demarai Gray a ni. Bayer Leverkusen winger hi pound maktaduai 1.7 in an lalut a, kum thum chhung atan contract an ziahpui.

Kum 25 mi winger contract hi a ṭul dan a zira kum khat dang pawhsei theih tura tih a ni a, Benitez hian winger Andros Townsend leh keeper Asmir Begovic chu free transfer-in a lalut tawh bawk.

Gray chuan, "Premier League khel tura club lian taka ka lo kir leh thei hi ka lawm takzet a, he team tana ka khel tur hi ka lawm a, bul ṭan ka châk tawh hle," a ti.

"Everton-in player pathum an lalut tawh" tia sawi chuan Merseyside club ṭantu fan-te tan chuan lawma zuan tawr tawrna tur niin a lang a, mahse, an sum sen hi pound maktaduai 1.57 chauh a nih avangin uanpui chi a ni lo tih erawh a lang thung.

Sum ngah ngah
Iranian-British sumdawng hausa Farhad Moshiri-a'n kum 2016-a Everton-a share tam zawk a lei khan tum chiang tak a nei a, chu chu sum tam tak senga Merseyside club hi English club ropuia din a ni.

Dollar tluklehdingawn hnih chuang hausakna neitu hian Arsenal-a a share a hralh chhan pawh kha share ngah ber Stan Kroenke nen sum hman lama an thu a inhmuh loh vang niin an sawi a, sum tam zawk hman theih a duh.

Moshiri-a'n Everton-ah a tum ang ngeiin share a lei a, a duh angin sum a hmang zui - pound maktaduai 500 chuang a seng tawh a, a duh ang tak erawhin team a la din chuang lo!

December 2019-a Carlo Ancelotti an lakluh phei kha chuan fans beiseina a sang a, 'King Carlo' hming lem an pek coach hnuaiah beiseina an nei sang - AC Milan, Chelsea, Paris Saint-Germain, Real Madrid leh Bayern Munich-a lo hlawhtling tawh coach a nih avangin a awm lo hran lo.

Mahse...
Ancelotti-a'n Goodison Park-a player a lakluh ho pawh an hrawl hlawm hle - James Rodríguez leh Brazilian midfielder Allan te chu Everton fans tam zawkin an club 'ang' tana khel tur chuan an beisei phak loh a ni.

King Carlo hian English centre back Ben Godfrey, Watford midfielder Abdoulaye Doucouré, French rawlthar beiseiawm Niels Nkounkou leh Sweden international Robin Olsen (loan) te pawh a lalut.

Mahse, Italian coach hnuaiah season bul an ṭan ṭha viau chungin season tawp a hnaih meuh chuan Everton fan-ten Europe inelnaa tel an beiseina chu a thamral tawh a, table-ah 10-na ni chungin season an khar.

Season tawp hnuah Real Madrid an rawn lang zui a, Ancelotti-a'n kum khata pound maktaduai 11 chuang hlawha Everton enkawl ai chuan pound maktaduai ruk vel hlawha Real enkawl hi a thlang zawk nia sawi a ni.

A tawpah Benitez
Everton-in Ancelotti thlaktu tur an zawng a, rin loh takin an hmelma kumhlun Liverpool manager hlui, Anfield-a lawm hlawh em em Rafael Benitez chu kum thum chhung atan contract an ziahpui.

Khawvela coach langsar zinga mi Benitez hian Premier League-ah ringawt pawh Liverpool, Chelsea leh Newcastle United a lo enkawl tawh avangin a mikhual lo - kum khatah pound maktaduai sarih bawr vel hlawh tura sawi a ni bawk.

Everton-in coach langsar leh hlawh hnem tho an lakluh avangin players lei nan inseng leh nual tura ngaih an ni a, mahse, tun thleng hi chuan Spanish manager hian uchuak taka sum sen a tum lo niin a lang.

Benitez chuan, "Sum lam sen phal chin kan ngaihtuah tel a ngai a, chuti chung chuan tum sang tak erawh kan nei tur a ni," a ti a, sum seng ṭeuh kher loa team din dan a hria niin a lang.

Beisei loh lam
Everton-in Crystal Palace leh Bayer Leverkusen aṭangin winger an lalut dawn tia sawi thawm a awm khan Everton fan-te chuan rei tak an lo rim tawh Wilfried Zaha leh Leon Bailey an mitthla mai thei.

Mahse, chuti lam chu Benitez-a hawina a ni lo - Liverpool boss hlui hian player pahnih hi lalut ta se a tlem berah pound maktaduai 80 bawr vel sen a ngai ang tih a chiang a, mahse, a sum sen zat erawh pound maktaduai 1.5 a ni.

Benitez-a'n Palace-a contract hmang zo hlim Townsend chu free transfer-a lalutin Gray pawh pound maktaduai 1.5 'lekin' a lei a, a sum sen tura an lo chhut lawk leh a thehchhuah chu inthlau tak a ni. Chutihrual chuan coach tam takin duhthlang dawn se Benitez-a thutlukna hi an ṭawm ang.

Townsend hi England tana vawi 13 inlana goal thum khung thei a ni a, Tottenham Hotspur, Newcastle United leh Palace tana Premier League khel tawh a nih avangin free transfer-a ani ang player lakluh theih hi Everton tan chuan thil lawmawm a ni.

Gray & Begovic
Demarai Gray-a'n Leicester-ah season nga hun a hmang a, Leicester City-in a nihna tak an hrechiang ber - match 169 ngawt a khelhsak hman a, kum 25 mi lek ni chunga a tawnhriat hi a ṭha hle.

Birmingham rawlthar beiseiawm ṭhin Gray hian beisei ang takin a career a la hmang lo - mahse, a kum a la tlem avangin sang tak thleng turin theihna a la nei a, pound maktaduai hnih pawh tling loa ani ang player lakluh hi Everton tan chuan thil lawmawm a ni.

Kum 34 mi Begovic hi Everton-ah Jordan Pickford thachhang dawltu a ni dawn tih a chiang a, kum 34 mi keeper hi free transfer-a lakluh a nih bawk avangin Everton tan ani ang tawnhriat nei ṭha a thlawna lakluh theih hi hlawkna a tling.

Portsmouth, Stoke City, Chelsea leh Bournemouth tan pawha Premier League lo khel tawh keeper hian season hmasa khan Championship-ah match 45 a la khel thei a, Pickford tan ngaihngam taka awmna chi a ni lo.

Tihsual siamṭhatna
Everton-in man to taka an lei zingah Cenk Tosun (£20.25m), Theo Walcott (£20.25m), Davy Klaasen (£24.30m) leh Yannick Bolasie (£26.01m) te chu an lei sual langsar zual a ni a, Benitez-a'n tihsual neih ve a duh lo.

Kum 61 mi coach hian Everton boss a nihna anga media a hmachhawn hmasak berah chiang taka sawiin, "Transfer chungchangah chuan manager-te hian ngaihdan kan nei ve ṭhin a, director of football leh board thawhpui thiam a ngai a, sum hman phal chin uluk taka thlir a ngai bawk.

"Kan team-in kan ṭhatpui tur player kan lalut thei a nih chuan a ṭha ka ti a, chutihrual chuan kan neihsa player-te pawh hma kan sawntir a ngai a ni," a ti.

Benitez-a'n mawlmang taka sum sen a duh lo a, fimkhur takin a che - coach tura lak a nih tira an duh lohna nasa taka lantirtu Everton fan-te hian lawm takin an coach-ah an pawm thei ang em, tih chu hunin a hril dawn e.