Arsenal-ah Smith Rowe a nghet

Emile Smith Rowe chuan Arsenal tan season nga daih contract a ziak thar, an inremna ziah dan hian manager Mikel Arteta-a'n team din thar a tumna kawngah hmun pawimawh tak a chang tih a lantir.

English midfielder hian season hmasa khan Premier League match 20 a khel a, kum 20 mi hian goal hnih a khung bakah a ṭhiante khung tur vawi li a siamsak bawk - a chet dan hi club dang pawhin an hmuh hmaih lo.

Gunners academy (Hale End) chhuak hi Aston Villa chuan lei tumim ṭum hnih an dawr, pound maktaduai 25 leh 30 tawktarh mah se North London club hian an chhuah phak lo; season tharah match tam zawk a khelh a rinawm.

Dennis Bergkamp leh Mesut Ozil te hak ṭhin jersey number 10 ha tur Smith Rowe chuan, "Contract thar ziak tur hian inbiakna a kaltluang a, inremna a awm thei hi ka lawm, ka tan chuan ka chhawr chhuahna club in min rin ngam tluka hlu hi a awm chuang lo," a ti.

Arsenal manager Arteta chuan, "Emile hian player theihna sang a ni tih a lantir tawh, season hmasa khan khelmual chhungah a fing hle tih kan hmu bawk," tiin RB Leipzig leh Huddersfield Town lama loan hmanga inchher hriam tawh a player a fak.