Ka dinhmun a him lo - Neville

Inter Miami boss Phil Neville chuan a zawna vawi ruk zet a team a tlawmpui hnuin a dinhmun a him loh thu a sawi a, Major League Soccer-a Eastern Conference-ah Miami hian table mawngphah an luah mek.

Neville chuan, "Club neitute thlawpna ka dawng a, ngaihtuahna seng tur chu keimah ka ni. Mahse, kan result vang hian ka dinhmun a him lo tih chu ka hria," a ti!

Inter Miami neitu zingah hian David Beckham pawh a tel a, he club hian league match 18 an khelh tawhah point riat chiah an la hmu a, goal kua lek khungin an lamah goal 22 a lut tawh thung.

Miami club hian an match hnuhnung berah New England Revolution chu 5-0 in an ngam lo a, Argentine striker Gonzalo Higuain, France tana World Cup nomawi chawi tawh Blaise Matuidi leh Stoke City defender hlui Ryan Shawcross te awmna team tan chuan mualphona a ni.

Neville chuan, "Ka player-ten in ennawn an mamawh a, chutiang chiah chuan keipawhin ka mamawh. Mawhphurhna zawng zawng ka la a, he team siam ṭhat hna hi ka thawh tur a ni.

"Chhuanlam tur a awm lo a, kan vaiin inenfiah kan mamawh vek. Team-ah chuan mimal pawimawh bik an awm a thiang lo tih kan hriat thar a ṭul a, unau ṭang ho ang maia he club tana kan beih hi a ngai a ni.

"Football khawvelah rei tak hun ka lo hmang ve tawh a, hetiang ang result-in a nghawng theih thil chu ka hre ve a ni," a ti.

Manchester United defender hlui hian 2018-ah khan a coaching career ṭanin England hmeichhe team a enkawl a, January 2021 khan a hna hi bansanin Miami hi a zawm.

England hmeichhe team hi kum 2019 khan SheBelieves Cup-ah a champion pui a, hemi kum vek hian hmeichhe World Cup-ah semifinal a luhpui bawk.

Mahse, a hun tawp lamah beisei ang result a nei thei lo a, Miami lamah beisei a phak lo mek bawk - a unaupa Gary Neville pawh Valencia-ah a lo hlawhchham tawh a, Neville unau hi football coaching lamah an ropui hleithei lo.