Boxing fixture a chhuak : Amit Panghal a bye, Mary Kom hmabak a harsa

Nimin khan Olympic boxing fixtures tihchhuah a ni a, Indian boxer pali bye zingah Amit Panghal a tel. Flyweight ranking-a number 1 Amit, Satish Kumar (super heavyweight) bakah hmeichhe boxer pahnih Simranjit Kaur (lightweight) leh Lovlina Borgohain (welterweight ) te an bye bawk.

Mary Kom-i'n first round-ah Miguelina Hernandez a hmachhawn dawn a, Manipur boxer ṭha hian hnehna a chang a nih chuan Ingrit Valencia nen last 16-ah an inhmachhawn dawn. Colombia boxer ṭha Valencia-i hian 2016 Rio-ah khan bronze medal a la.

Vawiin aṭangin Boxing first round hi India sanaah chuan zing dar 7:30 aṭangin an inhnek ṭan dawn. Indian boxer zingah Vikas Krishan chiah vawiin hian a inlan dawn a, tlai dar 3:54-ah a thlengtu Japanese boxer Okazawa Quincy Mensah nen an inhmachhawn ang.

July 25, Pathianni tlai dar 1:30-ah Mary Kom leh Miguelina Hernandez te an inhnek dawn a, tlai dar 3:06-ah Manish Kaushik leh Great Britain mi Luke McCormack te an inhnek ang.

July 26, Thawhṭanni tlai dar 3:06-ah Ashish Kumar leh Tuoheta Erbieke te an inhnehtawk dawn. July 27, Thawhlehni zing dar 10:57-ah Lovlina Borgohain leh German boxer Nadine Apetz te an inhnek dawn a, hei erawh second round (last 16) a ni tawh ang.

July 29, Ningani tlai dar 2:33-ah Pooja Rani leh Algerian boxer Ichrak Chaib te an inhmachhawn dawn a, hei hi first round ni mah se hmeichhe middleweight-ah hian boxer 16 chauh an awm.