Spain football team fiahin an awm dawn

Olympic football ṭan hmaa team sawi hlawh ber pakhat chu Spain an ni a, gold medal nen an sawizawm. Amaherawhchu La Roja hi an match hmasa berah Egypt-in an chelh a, tunah erawh knockout stage thleng lo palh theih an ni ta. July 25, Pathianni tlai dar 4:00-ah Spain hian Argentina hnehtu Australia an hmachhawn ang a, chawhnu dar 1:00-ah Egypt leh Argentina te an inkhel bawk ang.

Mipa inelnaah hian ram 16 an tel a, group paliah ṭhen niin a sang pahnihin quarterfinal an lut dawn. Olympic inelna hi FIFA kaihhruaina hnuaia neih a ni a, hemi a nih avang hian head to head aiin goal difference an dah pawimawh zawk.

La Roja hi an match hmasa berah Egypt nen an inhnehtawk a ni ringawt lo. Captain Dani Ceballos chu ke rek hliam vangin second half-ah a inlan tawh lo a, defender Oscar Mingueza pawh hliam vangin minute 22-naah lakchhuah a ni.

Amaherawhchu Spain hian player ṭha an la kawl hnem hle. Euro 2020-a La Roja inkhelh dan leh Egypt nena an inkhelh dan a inang ta lo. Spain senior team enkawltu coach ṭha Luis Enrique danglamna a hmuh theih a, chutihrualin tuna Under 23 team enkawltu Luis de la Fuente hian kum 2013 aṭangin Spain youth team hi a enkawl tawh a, theihna sang tak a nei tih erawh a chiang.

Australia lam erawh Spain angin an langsar lo a, amaherawhchu Argentina lakah 2-0 a hnehna an chan avangin dah hniam theih an ni lo ang. Argentina erawh insiamṭhat a ṭul hle a, vawiin tlaia Egypt an hneh lo a nih chuan tla thei dinhmunah an ding.