Brazil nena kan inkhel kan theihnghilh a ngai - Kuntz

Tokyo 2020-ah champion lai Brazil-in an match hmasa berah Germany 4-2 in an hneh a, Rio 2016 silver medalist an mualpho. Pathianni tlai dar 5:00 hian Germany-in Saudi Arabia an hmachhawn dawn a, point thum hmuh ngei a ṭul dawn.

Group D inkhel dangah Brazil leh Ivory Coast te an inhmachhawn dawn a, ram ṭha pahnih hi Pathianni tlai dar 2:00-ah an inkhel ang.

Germany coach Stefan Kunz chuan, "Ball kan in pass ṭha lo a, kan khelh danah huaisenna a tel lo a, tihsual kan ngah avangin Brazil tan counter attack hmanga vuak letna tur a tam hle. Inkhel kan thunun thei lo a, goal tam zawk khung thei an ni," tiin an match hmasa bera an inkhelh dan chungchang a sawi a, goal li ngawt an chhuah chungin Brazil-in goal tam zawk an khung theih thu a sawi.

Die Mannschaft hian Saudi Arabia lakah ṭha zawka an khelh a ṭul dawn a, chutihrualin Asia aiawha tel Saudi hi dah hniam theih an ni lo. Saudi Arabia hi African football thiam ram Ivory Coast aiin a khel ṭha zawk a, amaherawhchu a pawimawh ber goal an khung lo.

Brazil erawh rin lawk ang ngeiin an ṭha a, tlarhma player pathum Ajax forward Antony, Everton forward Richarlison leh Hertha Berlin forward Matheus Cunha te an hmuhnawm takzet. Bench aṭanga lut Bayer Leverkusen forward Paulinho pawhin mawi zetin a khung a, Selecao chhawr loh zingah Arsenal forward Gabriel Martinelli a la tel.

Ivory Coast tan AC Milan midfielder Franck Kessia-a'n a ṭhatna a pholang a, Saudi lakah goal ṭha a khung. Kessie goal khung tur Amad Diallo hming lam hmaih a thiang lo a, Manchester United rawlthar hian a khalh lut ṭha hle. Eric Bailly telna Ivory Coast tlarhnung erawh a phui tawk lo a, Brazil lakah fiahna hautak zawk an hmachhawn dawn.