United States tan thawhchhuahna hun

Olympic hmeichhe football chu vawiinah khelh chhunzawm a ni dawn a, ram 12 te a inlan vek dawn. Hmeichhe football ranking-a pakhatna United States chuan an match hmasa berah Sweden an hneh lo a, vawiin hi thawhchhuahna hun ṭha a ni ang.

Team 12 te hi group pathumah pali zela ṭhenhran an ni a, a sang pahnih ṭheuh bakah pathumna zinga ti ṭha pahnihin quarterfinal an lut dawn. Thlirna dang lehah chuan pali chiah an tla dawn tihna a ni a, team ṭha tan knockout thlen hi harsa tur niin a lang lo.

Group E
Vawiin tlai dar 4:00 hian Sapporo-ah inelna thlengtu Japan leh Great Britain an inkhel dawn. Japan hian point khat an hmu tawh a, Great Britain hian point thum an hmu tawh thung. Tlai dar 1:00-ah Sapporo hmunah tho hian Chile leh Canada te an inkhel ang.

Great Britain han tih hian England, Scotland leh Wales ram belhkhawm a kawk a, GB team-ah hian England-in player 19 thawhin Scotland aṭangin player pahnih thlan an ni a, Wales-in pakhat an thawh ve bawk. Hmeichhe football-a player langsar Lucy Bronze, Kim Little leh Ellen White te an awm avangin medal la thei tur zingah rin an ni.

Canada lamah hian international football-a ram tana goal khung tam ber Christine Sinclair an kawl a, ram tan goal 186 zet a khung tawh. Social media lam tuipui chuan Jordyn Huitema an hre ngei ang, kum 20 mi Huitema hi Bayern Munich defender Alphonso Davies nen an inkawp mek.

Group F
Tlai dar 4:30-ah Netherlands leh Brazil te an inkhel dawn a, group hmahruaitu zawnna tur a ni ang. Oranje hian match hmasa berah Zambia 10-3 in an sawp a, Arsenal forward Vivianne Miedema chuan goal li a khung.

Brazil hi hmeichhe football legend tiha sawi theih Marta-i'n a la ho a, kum 35 mi hian an match hmasa bera China an khelh ṭumin goal hnih a khung. Point la hmu lo Zambia leh China te hi tlai dar 1:30-ah an inkhel bawk ang.

Group G
United States-in match 44 chhung chak loh an neih tawh loh hnuah Olympic-a an match hmasa berah Sweden 3-0 in an hneh lo. Vawiin tlai dar 5:00 hian United States-in New Zealand an hmachhawn dawn a, thawhchhuah ngei an tum dawn. Carli Lloyd, Alex Morgan, Christen Press leh Megan Rapinoe te awmna United States hian point la hmu lo mah se medal lak beiseiawm an la ni tho.

Sweden-in tlai dar 2:00-ah Australia an hmachhawn dawn a, team pahnih hian point thum an hmu ve ve tawh. Hmeichhe football-a ram ṭha zinga chhiar tel Sweden hian United States an hneh a, Australia lakah pawh chak tura rinkai zawk an ni ang.