India medal hmasa ber chawi chhuaktu Mirabai Chanu

Rio Olympic 2016-a India tan medal a hlawhchhuah theih loh avanga depression neitu Saikhom Mirabai Chanu thawnthu chu ziah danglamin a awm ta.

Manipur nula Mirabai Chanu hi India tana Tokyo Olympic-a medal chawi chhuak hmasa ber a ni ta - kum 26 mi ritchawi chak hian Women's weightlifting 49kg category-ah Inrinni khan India tan silver medal a chawi chhuak a, Chinese nula Hoi Zhuihui chiah a phak lo.

Mirabai Chanu hian snatch-ah 87 kg chawiin clean and jerk-ah 115 kg a chawi a, a chawi rih zawng belhkhawm hi 202 kg a ni a, a vaia kg 210 chawi chhuak thei Hoi Zhuihui a tluk zo ta lo a ni.

Manipur chief minister N Biren Singh chuan an ram ti hmingṭhatu hi lawmpuina atan vaibelchhe khat pek a tiam a, hna ṭha tak ngaihtuahsak a nih tur thu a sawi bawk - India sorkar chuan nuai 50 a pe ang.

Medal zinkawng
Weightlifting-ah hian snatch leh clean & jerk tih chu inelna atana an hman a ni - snatch-ah chuan weightlifter-in a rit chawi tur kha chawl loin a lu chung lamah a chawi tlang nghal tur a ni.

Clean & jerk-ah erawh chuan a ritchawi kha a awmah a nghat phawt ang a, chumi zawhah a lu chung lamah a chawi kang leh ang a, 'buzzer' a rik hunah a dah thla ang.

Snatch leh clean & jerk-ah hian weightlifter-ten vawi thum an 'attempt' thei a, chuta an chawi rih ber chu an result-ah pawmsak an ni a, a tawpah snatch leh clean & jerk-a an chawi kha an belhkhawm leh a, chumi hmang chuan result an siam ṭhin.

Mirabai hian snatch-a a chawi hmasak berah 84kg a chawi a, hemi zawhah hian 87kg a chawi leh - mahse, a vawi thumnaa 89kg chawi a tum erawh a hlawhchham a, 87kg hi snatch-a a result chu a ni ta a ni.

Lungngaihna ata lawmna
Olympic ṭan a nih hma aṭanga India beiseina Mirabai Chanu hian kum 2016 khan Rio Olympic-ah India ai a awh a, mahse snatch-ah vawi khat chu 82 kg a chawi tih loh chu a hlawhchham vek - result nei loin a haw.

Hetihlai hian Mirabai hian depression a nei zui a, a talbuai takzet. Mirabai nu Saikhom Tombi Devi chuan, "Rio-ah khan a result min hrilh chuan awm dan kan thiam lo a, chhungkuain kan ṭap a ni ber mai. Ani pawh a beidawng a, infiamna chawlhsan mai kha a duh hman.

"Mahse, beidawng lo turin kan fuih a, chutiang maia a bansan theih loh thu leh kan thlawp tlat thu kan hrilh. Hrehawm tam tak a paltlang tawh a, a laklawha a tawp mai kha kan phal lo a ni," a ti.

Mihuaisen Mirabai-i'n a chhungte thusawi a zawm a, depression hnehin India tan Olympic medal meuh a hlawh chhuak ta - Indian lifter zinga Olympic-a silver medal hlawh chhuaktu a ni a, India ram infiamna chanchinah chuan a hming hriat rengin a awm tawh ang.

Awih a harsa
Manipuri lifter chuan, "Mumang ang mai a ni a, ka dinna hmun kha Olympic podium a ni tih ka theihnghilh hial a ni. Engkim mai kha a chiang lo ruai ni berin ka hria a, ka hming an lam a, medal ka awrh chiah khan kan ram tan silver ka hlawh chhuak tih ka pawm ngam ve chauh a ni," a ti!

Mirabai coach Vijay Sharma chuan, "Snatch-ah khan 86kg-a bul ṭan a, clean & jerk-ah 113kg-a bul ṭan kan tum zet a, mahse weight rit lo zawka bul ṭan khan kan him turah ngaiin thutlukna kan siam leh a ni," a ti a, thutlukna an siam fuh thu a sawi - a tluk loh awmchhun Zhihui khan Olympic record a siam tih hriat a ṭha.

India prime minister Narendra Modi chuan, "Hei aia Olympic bul ṭan nana duhthlan tur a awm chuang lo. India chu Mirabai result avangin a hlim takzet a, lawmpuina ka hlan a ni. A hlawhtlinna hian Indian zawng zawng a fuih phur vek a ni," a ti a, India president Ram Nath Kovind chuan twitter lamah lawmpuina thu a tarlang ve bawk.

Mirabai chuan, "Ka tan chuan duhthusam thleng dik a ni a, he medal hi kan ram tan ka hlan a, ka tana mi tluklehdingawn tel ṭawngṭaina khan min awmpui reng a ni," a ti - Mirabai hian Olympic logo anga siam chu bengbeh atan a hmang a, a nu siamsak niin a nu chuan,"A tan vanneihna a nih beiseia ka pawisa khawl leh rangkachak hmanga ka siamsak a ni," tiin a sawi.

Mirabai Chanu
Pianni leh thla 8 August 1994 (kum 26)
Pianna hmun Nongpok Kakching, Manipur
San Zawng 1.50 m (4 ft 11 in)
Rih zawng 49 kg (108 lb)
* A pa Kriti niin a nu hming Tombi a ni a, unau pianpui mipa pahnih leh hmeichhia pathum a nei.
Awards Rajiv Gandhi Khel Ratna, Padma Shri
Achievements
Gold: Women's 48kg, World Championships, Anaheim, USA, 2017; Women's 48kg, Commonwealth Games 2018, Gold Coast; Silver: Women’s 49kg, Tokyo Olympics, 2020; Women’s 48kg, Commonwealth Games, Glasgow, 2014;
Bronze: Women’s 49kg, Asian championships, Tashkent, 2021.

* Mirabai hi Indian lifter zinga Olympic-a silver medal hlawh chhuak hmasa ber a ni a, Karnam Malleswari (bronze, Sydney 2000) hnua lifter zinga medal hlawh chhuak leh hmasa ber a ni bawk.
* PV Sindhu hnua Indian hmeichhe zinga Olympic silver hlawh chhuak leh hmasa ber a ni.
* A coach hmasa ber chu L. Anita Chanu a ni a, Khuman Lampak training centre, Imphal-ah bul a ṭan.