World number 1 lakah India chak lo
Lalremsiami Hmar telna India hmeichhe hockey team chu Netherlands lakah 5-1 in an chak lo. India team hian Tokyo Olympic an group match hmasa berah world number 1 an hmachhawn nghal a, an beisei ang point an hmu thei lo.
India hian vawiin tlai dar 5:45 hian Germany an hmachhawn zui leh nghal dawn. World number 10 India tan number 3 Germany hi khingpui awlsam an ni leh dawn lo, Germany hian an match hmasa zawkah Great Britain chu 2-1 in an lo hneh tawh.
Group B-ah India hi Netherlands, Germany, Ireland, Great Britain leh South Africa te nen an awmkhawm, an inkhelh kual vek hnuah point hmu sang paliin quarterfinal a lut dawn a ni.
India chak lo
Inrinni tlai Oi Hockey Stadium-a inkhelah India lamin goal khung aiin a venhim hna thawh an tum a, hun chanve chhung chu khel ṭha thawkhat viau mah se second half-ah an tlarhnung a buai a, an tuar zui bawk.
Minute rukna lekah Dutch team lamin Felice Albers hmangin goal hmahruai an khung a, goal luh aṭanga minute li hnu lekah India captain Rani Rampal chuan sutin, chawlhlawk hma chuan goal dang a luh belh lo.
Coach Sjoerd Marijne-a'n an khingpui team hlauhawm zia a hre chiang, goal venhim lam a ngai pawimawh - hun rei tak chhung chu an inveng thei. Mahse, world number hi dan reng theih an ni lo - Margot van Geffen, Albers, Caia van Maasakker leh Frederique Matla ten an khung belh.
Mizo nula
India tan Mizo nula Lalremsiami a inlan a, goal erawh a khung lo. FIH Rising Star of the Year pawh ni tawh Remsiami hian mual vei lam sir aṭangin vanneihna a zawng ṭhin a, amaherawhchu goal a sual chhuak zo lo.
Tokyo Olympic neih laia Mizo inlan awmchhun Remsiami hi Germany an hmachhawn hunah pawh inlan leh tura ngaih a ni. Hockey huangah hian team ṭha zual 12 an inel a, India hi ranking-ah 10-na an nih avangin point hmuh a harsa dawn.
India coach Sjoerd Marijne chuan, "Netherlands lakah first half chhung khan ball 50% kan chang thei, kan khel chhe lo. Mahse, quarter thumna aṭang khan hmun awl kan siamsak hnem a, a pawi zo ta a ni. Theihna kan neih avangin beisei kan la nei," a ti.
