Solskjaer-a'n contract a pawtsei

Manchester United manager Ole Gunnar Solskjaer chuan a contract neih lai chu kum khat atan a pawtsei a, kum 2024 thleng Old Trafford-ah a cham ang. English club hian Norwegian manager hnuaiah nomawi an la chawi lo. Kum 48 mi Solskjaer hian Jose Mourinho a thlak a, December 19, 2018 khan manager lailawk atan ruat a ni a, March 28, 2019 khan a ngheta lakluh niin kum thum daih contract a ziak.

Man United executive vice-chairman Ed Woodward chuan, "Ole-a kaihhruaina hnuaiah hian kawng dik kan zawhin kan hria a, kan ring tawk hle. Club-in innghahna lungphum ṭha a neih theih nan Ole leh a thawhpuite an thawkrim a, season hnih chhungin hmasawnna pawh a awm.

"Kan academy aṭangin player talent nei ṭha tak tak inelna hmachhawn thei turin kan chher hriam a, player ṭha kan lalut. Manchester United kal dan ṭhin angin attacking football kan khel bawk," tiin Norwegian manager hnuaia club hmasawnna a sawi lang.

Solskjaer hian player a nih laiin Man United tan season 11 a khel a, 1999 Champions League final-ah chakna goal khungtu kha a ni. Sir Alex Ferguson-a'n kum 2013-a a chawlh hnuah Solskjaer hi manager nghet palina a ni.

Season liam ta khan Man United hi Premier League-ah pahnihna an ni a, Europa League final lut mah se penalty shootout hmangin Villarreal an hneh lo. Tun season-ah Man United-in nomawi chawi ngei tumin nipui bazarah ṭum dang zawng aiin hma an la chak a, pound maktaduai 73-in Borussia Dortmund aṭangin Jadon Sancho an lalut fel tawh.

Man United manager Solskjaer chuan, "Club laka ka rilru put dan hi tu pawhin an hrethiam ang. Manchester United tan chuan hun phurawm tak a ni a, squad ṭha tak kan nei a, player naupang zawk leh tawnhriat nei ṭha an inchawhpawlh ṭha hle. Manchester United hian nomawi lian chawi a duh a, chu chu kan tum pawh a ni. Khemual chhung leh pawn lamah nasa takin hma kan sawn ni," tiin sawi.

Solskjaer-a contract pawhsei thu Inrinni khan an puang a, hemi ni vek hian Manchester United-in frineldy match-ah Queens Park Rangers 4-2 in an hneh lo nghal. Loftus Road-a inkhelah hian Man United tan Jesse Lingard-a'n minute thumna lekah khung mah se QPR-in Charlie Austin (7'), Lyndon Dykes goal hnih (53', 59') leh Moses Odubajo (58') hmangin an chhanglet. United tan Anthony Elanga-a'n minute 73-naah a khung a, goal dang a luh belh lo.

July 28, Nilaini zan dar 12:30 hian Manchester United-in Premier League kaithar Brentford an mikhual dawn a, hemi hunah hian player thar Jadon Sancho pawh inlan thei tur a beisei a ni.