Dillashaw a lo kir e

United States Anti-Doping Agency (USADA) in kum hnih zen zawn an hrem avanga a chawlh hnuah UFC lamah TJ Dillashaw a lo kir leh ta a, kum 35 mi fighter hian nimin zing khan Cory Sandhagen chu split decision (47–48, 48–47, 48–47) hmangin a hneh.

Dillashaw hian January 2019 khan Henry Cejudo chu flyweight-a fight a hmachhawn hmasak berah a hneh lo a, a hnuah damdawi hman phal loh a hmang tih hmuchhuah a ni zui a, March 20, 2019 khan UFC bantamweight title a kawl lai chu a kalsan thu a puang nghe nghe.

Mahse, kum 35 mi a ni tawh chungin American fighter hi a tha a lo la za reng a, vawi 17 fight a hmachhawna a vawi thum nana tlawm ve chiah Cory Sandhagen tan chuan a lo la u hret.

TJ Dillashaw chuan, "Min sawichhetute avangin ka hnual duh lo a, hnehna ka chang dawn tih hi ka hrechiang sa a ni. Fight hautak em em a ni a, ka tan chuan title fight ang mai a ni.

"Cory Sandhagen hi fighter ṭha tak a ni a, ka training pui tawh a nih avangin hetiang tak hian a ṭha dawn tih a inhriat hma khan kei chuan ka hre daih tawh," a ti a, a hneh tak fighter a fak.

TJ Dillashaw hian fight-a hmachhawn tawh vawi 21-ah vawi 17 hnehna a chang a, vawi li a tlawm tawh thung.