World number 1 Barty a tla nghal

Hmeichhe tennis world number 1 Ashleigh Barty chu Tokyo Olympic 2020-ah hneh nei loin a tla. Nimin zing khan Barty hian a match hmasa ber khelin, world number 48 Sara Sorribes Tormo lakah a tlawm.

Wimbledon champion ni chungin Japan khawpui a pan a, champion tura rinkai ber pawh a ni. Mahse, Australian star hian set hnih an khelh chhungin a service a hloh ve ve; Spain nula lakah hian 6-4, 6-3 in a chak lo.

Spain nula Sorribes Tormo chuan, "Olympic khelh hi ka duhthusam a ni ṭhin, tunah chuan Olympic-ah world number 1 meuh ka hneh chu a ni si, mumang ni loin a tak tak a ni bawk si," tiin hnehna a chang chu a lawm hle, second round-ah Fiona Ferro (France) a hmachhawn leh ang.

A harsa
Barty hi hripui leng hlau tak mai zinga mi a ni a, nikum pawh khan hri leng vang hian inelna a hmachhawn mumal lo. Kuminah a inkhel ve leh deuh chauh a, a khelh chinah chuan a ti ṭha viau zel.

Mahse, Olympic Village-ah hri kai an awm avangin a riak lut ngam ve lo a, Japan khawpui boruak lum tak karah inkhelh a harsat hle tih a lang. Australian nula zinga tennis huanga Olympic gold medal la hmasa ber nih a tumna chu a thlawn rih.

Singles huangah tla nghal mah se doubles huangah a la inlan leh dawn. A hnampui Storm Sanders nen an ṭangdun dawn a, tualchhung nula Nao Hibino leh Makoto Ninomiya te ṭangdun nen an inhmachhawn ang.

Osaka a lo kir
Rilru lam harsatna a neih avangin Naomi Osaka chu French Open leh Wimbledon aṭangin a inhnukdawk a nih kha, an ram Japan khawpuia infiamna khawmpui lianah erawh mawhphurhna sang tak a chelh avangin a inlan.

Zirtawpni tlaia Olympic hawnna neih a nih khan Osaka hian Olympic meichher chu a dep kai a, a hmelah hlimna leh lawmna a lang chhuak - hun rei tak chhung lungngai taka awm tawh a nih avangin lawmpuitu a ngah hle.

Nimin khan tennis inelna huangah Osaka hi a inlan zui a, a khingpui Chinese nula Saisai Zheng chu 6-1, 6-4 in a sawp. A match lehpekah chuan Switzerland aiawhtu Viktorija Golubic nen an inhmachhawn leh ang.

A zam ve asin
Chuo-ku, Osaka-ah a piang a, a hming atan Naomi Osaka an vuah. Kum thum mi chauh an nih laiin New York lamah an pem a, ram pahnih tan khua leh tui nihna a nei - a pianna Japan aiawhtu nih a thlang thung.

World number 2 Osaka chuan, "A nihna takah chuan Japan ramah ka awm tam lo a, tun hnai kum hnih chhunga ka zin lehna hmasa ber a ni hial - rilru a phawklekin ka zam ve hle, ka awmdan tak pawh sawi thiam a har.

"Olympic ka khelhna hmasa ber a ni a, mahni ramah ngei mai mawhphurhna sang tak chelh chunga inlan chu a nuamin a hlimawm. A lawmawm lai tak pakhat chu match hmasa bera hnehna ka chang hi a ni," a ti.

Inkhel dang
Czech Republic tan Wimbledon finalist Karolina Pliskova a inlan a, world number 7 hian a match hmasa berah France aiawhtu Alize Cornet chu 6-1, 6-3 in a sawp, hnehna chang tur hian harsatna a tawk lo.

Belarus nula, seeded pathumna ni bawk Aryna Sabalenka chuan Poland nula Magda Linette chu 6-2, 6-1 in a hneh. Spain nula, cancer ngamtu Carla Suarez Navarro pawhin Ons Jabeur chu 6-4, 6-1 in a hneh ve bawk.

Nimin khan Tokyo khawpui lum lam hi 32 degree a ni. International Tennis Federation (ITF) inkaihhruaina angin, khaw lum lamin 30.1C a pelh chuan inkhelh laklawh lai hian minute 10 an chawl lailawk ṭhin, nimin pawh hian chawlh an nei a ni.