Olympic - Boxing : India chhuanvawr Mary Kom a chak nghal

Mary Kom chuan Oympic boxing hmeichhe flyweight-a last 16 lut turin nimin khan Miguelina Hernandez Garcia chu split decision (4-1) in an hneh. Mipa inelnaah Vikas Krishan leh Simranjit Kaur te an match hmasa berah an chak lo thung.

Vawiin tlai dar 3:06 hian middleweight (75kg)-ah Indian mipa boxer Ashish Kumar chuan Chinese boxer Tuoheta Erbieke a hmachhawn dawn. Himachal Pradesh boxer Ashish hian Asian Championships-ah kum 2019 khan silver medal a la tawh a ni.

Ashish Kumar hi chak zawk tura beisei a ni a, hnehna a chang a nih chuan last 16-ah Hebert Conceicao a hmachhawn thei dang. Kum 23 mi Brazilian boxer hian World Championships-ah bronze medal a la tawh a, quarterfinal thlen a harsa dawn.

India beiseina Mary
India chhuanvawr Mary Kom hian Dominican Republic boxer Miguelina Hernandez Garcia lakah fimkhur takin bul a ṭan a, Manipur boxer hian a khingpur rawn nawr karah a hnek (jab) mawi thei hle.

Second round-ah Mary Kom a insiamṭha leh hret a, chutihrualin 2019 Pan American Games bronze medalist Miguelina tawh a khirh ve hle. Round hmasa pahnihah Judge panga zinga pathumin Mary Kom an chaktir ve ve.

Round thumnaah vawi ruk World champion ni tawh Mary Kom a rawn lang a, judge pangain chak zawkah an puang vek. A tawpah Mary Kom a chungnung ta zawk a, 4-1 (30-27, 28-29, 29-28, 30-27, 29-28) in hnehna a chang.

Kum 38 mi Mary Kom hian July 29, Ningani tlai dar 3:36-ah Colombia boxer Ingrit Valencia a hmachhawn dawn a, vanduai theihna a ni ang. Kum 32 mi Valencia hian Rio 2016-ah bronze medal a la a, boxing khawvelah record duhawm tak a nei bawk.

Mipa an tlawm
Indian boxer zinga inlan hmasa ber Vikas Krshnan-a'n inelna thlengtu Japanese boxer Okazawa Quincy Mensah a hmachhawn a, unanimous decision-in a chak lo. Japanese boxer Okazawa hi round thumah judge ten an dah chungnung vek a ni.

Nimin tlai khan Manish Kaushik-a'n Great Britain boxer Luke McCormack a hmachhawn a, an inhnehtawk hle. Kokugikan Arena-ah McCormack-a'n first round 3-2 in a la a, Haryana boxer Manish-a'n second round-ah 3-2 in an la ve thung.

Round tawp berah Luke McCormack a dingchang ta zawk a, judge zawngin chak zawkah an dah. Great Britain boxer hian split decision (4-1) in hnehna a chang.