Hnehna nena bulṭan Sindhu

Badminton world champion ni lai PV Sindhu chuan hnehna nen Tokyo Olympic 2020-ah bul a ṭan. Indian shuttler hian nimin zing khan Israel nula Ksenia Polikarpova chu straight game in a hneh.

Olympic atan kum 26 mi Sindhu hi seeded parukna pek a ni a, a khingpui world number 58 lakah harsatna a tawk lo. Group J inkhelah Sindhu hian 21-7, 21-10 in hnehna a chang.

Rio Olympic silver medalist hian game hmasa chu harsa vak loin a la, game hnuhnung zawkah erawh 5-5 in an in nih rual - an inkhel tawk viau dawn niin a lang hman, mahse Indian star hian a zawna point 14 zet hmuin a chak fal leh ta hle.

Sindhu chuan, "A ṭha thei ang bera khel turin ka inbuatsaih a, match hmasa bera match hautak lutuk lo ka khel thei hlauh hi a lawmawm hle. Chak mah ila ka chak dan hi a awlsam tia sawi chi erawh a ni lo," tiin a sawi.

A group match pahnihnaah Sindhu hian Nilainiah Cheung Ngan Yi a hmachhawn leh dawn. Hong Kong nula hi world ranking-ah 34-na a ni a, tun hma lama an sulhnu en chuan India nula hi a chak a rinawm.

Sindhu chuan, "Match khat zelin ka ngaihtuah, tunah chuan Ngan Yi nena kan inkhelh tur atan chauh rilru ka pe leh phawt. A hmuna entu an awm loh avangin a khawhar thlak a, mahse awm hmun aṭangin mi tam takin min ṭan tih ka hriat avangin ka lawm," a ti.

India nula in quarterfinal leh semifinal lama a hmachhawn theih tur zinga mi, player ṭha Akane Yamaguchi leh Tai Tzu Ying te pawhin an group match hmasa lamah hnehna an chang ve bawk.