Champion lai Murray inhnukdawk

Great Britain fa chuam, Olympic hnuhnung pahniha gold medal la ve ve thei Andy Murray chu Tokyo Olympic mipa tennis singles huang aṭangin a inhnukdawk - doubles pawh a khel chhunzawm thei dawn ta lo niin a lang.

World number 1 hlui Murray hi singles leh doubles khel turin Tokyo Olympic-ah hian a kal. Training pawh ṭha takin a nei thei, mahse a malpuiah hliam tenau a neih avangin inelna a hmachhawn thei dawn ta lo.

Kum 34 mi Murray chuan, "Hetiang dinhmuna ka ding hi a pawi ka ti takzet, amaherawhchu medical team lamin thurawn min pek angin ka tan inkhelh chhunzawm zel a rem tawh lo.

"Damdawi lam thiamte chuan inkhel tawh rih lo turin min duh, mahse singles aṭangin ka inhnukdawk phawt a, doubles-ah chuan Joe Salisbury nen kan la ṭan dun theih ka beisei," tiin a sawi a, beiseina nei mah se doubles pawh hi beiseina a sang lo hle.

Grand Slam vawi thum champion tawh Murray hian London leh Rio Olympic-ah khan Britain tan gold medal a lo vaw chhuak tawh, kuminah erawh hliam vangin a tum ram a thleng zo dawn ta lo.