UAE lamah Bernard a pem

Everton winger Bernard chuan United Arab Emirates club Sharjah FC chu season hnih chhung atan a zawm a, a man zat hi Euro maktaduai khat bawr vel ni tura ngaih a ni.

Brazilian player beiseiawm ni ṭhin, beisei phak ta lo Bernard hi sum tam zawk uma UAE pan erawh a ni lo a, Premier League club-ah kar khata £120,000 a hlawh laiin Sharjah erawhin kar khatah £80,000 an pe dawn niin an sawi.

Kum 28 mi Bernard hian Shakhtar Donetsk aṭangin a European football zinkawng a zawh ṭan a, season nga zet a khelh hnuah kum 2018 khan Everton a zawm.

Merseyside club tan hian season thum chhungin inelna hrang hrangah match 84 a khel a, goal riat khungin assist vawi sarih a nei hram a ni.

Brazil tana vawi 14 inlan thei winger hian Everton fan-te leh a khelhpuite hnenah lawmthu sawi chungin English club a thlah a, "Club a thil thleng a zahve lek pawh in hre si lo a ni," tiin club-ah fans hriat loha thil thleng tam tak a awm thu a sawi lang zauh thung.