PSG-ah Poch a cham dawn

Paris St-Germain coach Mauricio Pochettino chuan Paris club-ah kum khat dang cham turin contract thar a ziak a, kum 2023 thleng chu PSG-ah a awm dawn tihna a ni.

Kum 49 mi coach hian January khan French club hausa hi kum 2022 thleng cham turin a zawm a, season chanve hna a thawh hnuah kum khat dang atan contract pek belh a ni leh ta.

Player-a nih laia PSG captain (2001-2003) lo ni tawh Poch chuan, "Keima tan mai ni lo, ka staff-te tan pawh ka hlim takzet a ni. Club-in min rintawkna hi kan tana pawimawh em em chu a ni a, fan-ten chhuang taka PSG chanchin an sawi theih nan theihtawp kan chhuah ang.

"Kan zavaia thawk hoin kan tum ramte thlen kan tum dawn a ni. Kum 20 liam ta khan he club tan hian captain armband ka lo hreng tawh a, tunah coach ka ni leh ta. Ka tan chuan duhthusam a thleng dik a ni," a ti.

Poch hian season hman zawh takah khan PSG chu Champions League semifinal a hruai thleng a, Manchester City an ngam lo. Ligue 1-ah Lille tluk loin an champion zo lo bawk.

Mahse, PSG chairman Nasser Al-Khelaifi chuan Pochettino chunga rinna an nghah thu sawiin, "Mauricio-a'n PSG-a cham a thlang hian min ti lawm hle. Club captain lo ni tawh a nih avangin he club kalphung, nihphung leh hmachhawpte a hrechiang em em a, a hruaina hnuaiah hmabak êng tak kan neiah kan ngai a ni," an ti.

PSG hian nipui transfer-ah Georginio Wijnaldum, Achraf Hakimi, Sergio Ramos leh Gianluigi Donnarumma te an lalut tawh.