Fulham-in Wilson leh Gazzaniga lalut

Championship club Fulham chuan Premier League-a kir leh ngei tumin player an lak belh a, Liverpool attacking midfielder Harry Wilson leh Tottenham goalkeeper hlui Paulo Gazzaniga te an lalut.

Kum 24 mi Wilson hi rawlthar beiseiawm tak ni ṭhin mah se Jurgen Klopp-a hnuaiah hmun a chang phak lo a, Reds-a awm chhungin club panga zetah loan-in a khel hman - season hmasa khan Cardiff City tan Championship a khel a, inelna hrang hrangah match 38 khela goal sarih khungin assist vawi 12 a nei thei.

Wilson-a man zatah Fulham hian pound maktaduai 12 an inseng nia sawi a ni a, kum 2026 thleng khel turin contract a ziak. Wilson chuan, "Premier League khelh châk vek kan nih avangin top flight league-a Fulham-in kir an tum dan enin he club hi ka zawm a ni," a ti.

Liverpool tan match hnih chiah khela Crewe Alexandra, Hull City, Derby County leh Bournemouth-ah te pawh loan-a hun lo hmang tawh Wilson hi Benfica pawhin duh mah se Portuguese club ngamna a tlem avangin Reds-in an pawm duh lo a, nikum nipui lai khan Burnley-in pound maktaduai 11-a an dawrna chu an lo hnar tawh bawk.

Kum 29 mi Gazzaniga chuan Fulham tan kum hnih chhung khel turin contract a ziak bawk a, Spurs-ah a contract a hman zawh tawh avangin Championship club hian a thlawnin an lalut.

Argentine keeper hian League Two club Gillingham-ah kum 2011 khan a professional career a ṭan a, 2012-18 chhung Southampton-ah khel lehin Saints-a a cham lai hian 2016-17 season khan Rayo Vallecano-ah Spanish second division league a khel.

Kum 2017-ah Spurs a zawm a, season hman zawh tak chawhnu lamah khan La Liga club Elche-ah loan-a khelin Spurs-a a cham chhung hian match 37-a khel hman.