Olympic Football-ah Ivory Coast-in Brazil an chelh

Olympic football-ah nimin khan Ivory Coast-in champion tura rinkai zinga mi Brazil an chelh a, Yokohama-a inkhelah a hian goal awm loin an inhnehtawk.

Brazil-in an match hmasa berah Germany 4-2 in an hneh a, Ivory Coast lakah pawh hian inrintawkna nen bul ṭanin Richarlison a hlauhawm nghal.

Amaherawhchu Ivory Coast-in kum 33 mi Max-Alain Gradel an kawl a, counter attack hmangin an nawr ve zel. Minute 13-naah Brazil an chesual a, Douglas Luiz-a'n Gradel a tih tluk vangin hnawhchhuah a ni.

Aston Villa midfielder Douglas Luiz hnungah keeper chauh a awm tawh chungin replay ennawn phei chuan Selecao tan thutlukna pawm harsa a la ni tho. Brazil-in player 10-a an khelh a ṭul phah.

Player pakhata kim lo chungin Brazil-in inkhel an thunun a, goal khung theihna hun ṭha pawh nei mah se Everton forward Richarlison vanneih ṭum a ni lo a, minute 78-naah Paulinho-a'n a thlak.

Minute 80-naah Eboue Kouassi-a'n yellow card vawi hnihna a hmu a, team pahnihin player 10 ve vein khel mah se goal hmuh tur a awm lo. Group D inkhel dangah Germany-in Saudi Arabia 3-2 in an hneh hram. Nizan inkhelah hian 2-2 a nih laiin German defender Amos Pieper hnawhchhuah a ni a, player 10-a khel Stefan Kuntz-a hote tan minute 75-naah Felix Uduokhai-a'n chakna goal a khung

Germany-in an match hnuhnung berah Ivory Coast an hmachawn dawn a, quarterfinal lut turin chak ngei a ṭul dawn. Brazil-in team nem ber Saudi Arabia an hmachhawn dawn a, Asian team hian point an la hmuh loh avangin an tla tawh thung.