400m freestyle-ah Qualifying-a muang berin gold a la

Pathianni khan Tunisian swimmer Ahmed Hafnaoui chuan mipa 400m freestyle-ah result danglam thlentirin gold medal a la. Kum 18 mi Hafnaoui hi qualifying round-ah thleng tlai ber a ni a, amaherawhchu inelna takah minute thum leh 43.36 seconds-ah a thleng a, Australia swimmer Jack McLoughlin a hneh.

Qualifiying round-ah Hafnaoui hian minute thum leh 45.68 a hmang a, final round-ah thilmak thlentirin a hleuh chak ber. Tokyo Aquatics Centre-a inelna neihah hian US swimmer Kieran Smith chuan bronze medal a la ve bawk.

Hafnaoui chuan, "Mak ka ti. Mumang ram ang mai a ni a, a ropui takzet. Inelnaa ka chet ṭhat ber ṭum a ni," tiin a sawi. Tunisia ramin Olympic inelna hrim hrima gold medal panga an lakna a ni a, swimming bika gold pathum an lakna a ni.

Hafnaoui hi Tunisian national basketball player Mohamed Hafnaoui fapa a ni a, 2018 Youth Olympic Games-ah khan telin 400m-ah pariatna a ni a, 800m-ah pasarihna a ni. Kum 2019 khan Tunisian swimmer hian 2024 Olympic Games-ah gold medal lak a tum thu a sawi a, a beisei aia hmain gold a la. Thawhlehni hian 800m freestyle-ah inelna a hmachhawn leh ang.

Inelna thlengtu Japanese swimmer Yui Ohashi pawhin 400m individual medley-ah gold medal a la a, hei pawh hi result mak tia sawi a ni. Kum 25 mi Ohashi chuan, "Rio Olympics-ah khan ka tel thei lo a, chuvangin kum nga chhung chu tun hun hi kan thlir tawh. Hetiang dinhmuna ka ding thei hi mak ka ti a, ka lawm bawk," tiin sawi.