Hmeichhe Olympic football : Great Britain leh Sweden-in quarterfinal an lut

Hmeichhe Olympic football group match chu Inrinni khan khelh chhunzawm a ni a, Great Britain leh Sweden ten match hnih khelhah hnehna chang ve vein quarterfinal an lut

Inelnaah hian ram 12 an awm a, group pathuma ṭhen niin a sang pahnih bakah pathumna ti ṭha pahnihten quarterfinal an lut ang. Group match hnuhnung ber hi July 27, Thawhlehniah khelh a ni dawn a, team tel 12 ten quarterfinal luh beiseina an la nei vek.

Goal khung thei White
Great Britain-in inelna thlengtu Japan 1-0 in an hneh a, goal awmchhun hi Ellen White-i'n minute 74-naah a khung. Kum 32 mi White hian Chile 2-0 a an hneh ṭumin goal hnih a khung tawh bawk a, Great Britain hian match hnihah hnehna an chan ve ve avangin quarterfinal an lut.

Canada-in an match hmasa bera Japan nen an inhnehtawk hnuin Janine Beckie goal hnih hmangin Chile 2-1 in an hneh a, goal khungtu Beckie hi Manchester City-a khel lai a ni.

Goal a sur
Group F-ah goal 14 zet a lut a, goal a lut tam hle. China leh Zambia te 4-4 a an inhnehtawk bakah Netherlands leh Brazil 3-3 in an inhnehtawk bawk.

China forward Wang Shuang-i'n goal li a khung a, kum 26 mi Shuang hi PSG tante pawh khel tawh niin tunah erawh Wuhan Jianghan University tan a khel mek. Zambia forward Barbra Banda-i'n match zawnin hattrick a siam a, tun inelnaah goal ruk a khung tawh. Kum 21 mi Banda hi Chinese club Shanghai Shengli a khel lai a ni.

Netherlands tan Arsenal forward Vivianne Miedema a che ṭha chhunzawm zel a, Brazil lakah goal hnih a khung avangin tun inelnaah goal ruk a khung tawh. Brazil leh Oranje ten hma an inhruai chhawk a, Dominique Janssen-i'n minute 79-naah Netherlands siphurh sutna goal a khung hnuah goal a luh belh tawh lo.

US an tho chhuak
United States-in an match hmasa berah Sweden an hneh lo a, match hnihnaah New Zealand 6-1 in an sawp a, gold medal la tura rinkai zinga mi an la ni reng. Sweden pawh an khel ṭha chhunzawm a, Australia 4-2 a an hneh avangin quaterfinal an lut.

US hian goal ruk ngawt khung mah se an player zingah goal hnih khung an la awm lo a, goal hnih hi New Zealand player Abby Erceg leh Catherine Joan Bott ten an lama an tihluh a ni.

United States tana goal khungtu zingah Alex Morgan a tel a, US forward hian May 7, 2020 khan fanu Charlie Elena Carrasco a nei chungin Olympic-ah a inlan leh thei a ni.