Argentina leh Spain an chak hram

Tokyo Olympic mipa football-ah Argentina chuan 1-0 in Egypt an hneh, nimin inkhela goal awm chhun hi Facundo Medina-a'n minute 52-naah a khung niin, African team lamin a chhan letna tur an nei lo.

Nimin inkhelah hian tun inelnaa champion rinkai zinga mi Spain-in minute 81-naa Mikel Oyarzabal goal hmangin Australia 1-0 in an hneh hram bawk.

Argentina hi an match hmasa zawkah an chak lo, player kim loa khelin Australia lakah 2-0 in an tlawm. Egypt lakah hian chak zo lo zui leh ni se la chuan knockout stage luh beiseina a thamral ang, an chak vang erawh chuan beisei an la nei thei - group match hnuhnung berah team ṭha Spain nen an inkhel leh ang.

Pharaohs hian an match hmasa berah Spain an inhnehtawkpui a, point khat an nei. La Roja laka inkhel bul ṭantu pakua ngawtin Argentina an hmachhawn nawn a, hun rei tak an goal venghim thei mah se tihsual zeuh an neih an tuar. Egypt hian an match hnuhnung berah Australia lakah hnehna an chang thei a nih chuan quarterfinal an la lut thei ang.