Arsenal veltu Harry Kane

Harry Kane-a tauh luh hmangin Tottenham Hotspur chuan an hmelma Arsenal 1-0 in an hneh a, pathumna dinhmun luah lailawktu Spurs tan Champions League beiseina a nun laiin parukna Gunners beiseina a chuai mek - North London club pahnih inkarah point sarih zet a awm ta.

Danglamna Kane
Inrinni zan Wembley Stadium-a North London derby vawi 181-na inkhelah, mual sir aṭanga Ben Davies cross chu Arsenal defender Laurent Koscielny aia zuang sang zawk English striker Kane-a'n goalkeeper Petr Cech dan theih lohin minute 49-naah a tauh lut.

Kum 24 mi Kane hian 2015 February thla khan Arsenal lakah chakna goal hlu tak a tauh lut tawh bawk, tun hnai Premier League match bikah an ṭhenawm club hi vawi sarih a hmachhawnah goal sarih a khung thei!

Tottenham manager Mauricio Pochettino chuan, "Harry Kane hi kan tan chuan tun hun leh nakin hun a ni, a chet dan kha centre forward tih dan tur dik tak a ni. Ani kan nei hi kan vannei hle," tiin a player a chhuan thu a sawi.

Manchester United si hnih faii an hneh hnuah Spurs hian Liverpool an draw leh a, tunah Arsenal an hneh zui bawk. Poch chuan, "Match hautak pathum kan hmachhawn zawn a, ka nauten beisei phak baka ṭhain an khel a ni," a ti.

Beisei phak lo Arsenal
Everton laka goal thum khungtu Aaron Ramsey chu a ṭhâl na vangin a inlan lo a, Gunners midfield luahtu Jack Wilshere leh Granit Xhaka ten Spurs midfielder Mousa Dembele-a ball sem lai an en hnai viau.

Henrikh Mkhitaryan leh Pierre-Emerick Aubameyang ten beisei an phak loh zanah, bench aṭanga luhtir Alex Iwobi leh Alexandre Lacazette ten tihsual an ngah avangin danglamna an siam lo. Gunners si ban nghaktu kha Cech kher ni lo se chuan goal tam zawk phur thei an ni.

Gunners manager Arsene Wenger chuan, "A sang pali zinga tel phak a harsa tawh dawn, mah se a tawp thlengin kan bei ang," a ti. Wenger hian replay a ennawn hnuah Kane-a'n goal a khung dawn khan a foul loh thu leh, striker ṭha chet dan tur taka a chet thu a sawi a, danglamna thlentu English striker a fak.

Wenger-a naute hmabak a harsa chho dawn hle niin a lang, an league match lehpek atan March 1 zanah hmahruaitu Manchester City an mikhual dawn a, Spurs hian February 25 zanah Crystal Palace an lenchilh thung dawn.