32nd Captain NM Gupta Trophy Mizoramin final an lut

Santosh Trophy khel tura inbuatsaih Mizoram chuan nimin khan 32nd Captain NM Gupta Trophy-ah ASEB chu 1-0 a hnehin final an lut a, he inkhela goal awmchhun hi MC Malsawmzuala'n second half-a a khung a ni.

SM Dev Stadium, Sil­char-a inkhelah Mizoram team-in goal an khung hnu­ah Lalmuanzova hnawh­chhuah a nih avang­in Guwahati club-in Mizo team an nawr a, mah se hun tawp thlenga ṭang tluanin nikum semifinal-a penalty hmanga an hneh team lakah hnehna chang turin minute 90 bak an mamawh lo - ASEB-ah hian Zodinpuia a khel a, Lunglei tlangval hi defence laiah rinrawl a ni.

Mizoram hian inkhel thunun mah se an khingpuite'n an goal an ven tlat avangin goal an khung hleithei lo a; second half-a an goal thun an chakpui ta a ni.

Mizoram team hi Silchar Mizote'n an ṭawiawm ṭha ṭhin hle.

Semifinal inkhel hmasa zawkah Army Green chuan 3-1 in ARC an hneh a, naktuk tlai dar 4:30-ah Mizoram nen final an khel ang - team pahnih hi nikum khan final-ah lo intawng tawhin Mizoram an champion a, Lalfakzuala'n goal awm chhun a khung.

Mizoram hian semi­final lut turin group stage-ah match li khelin NF Railway (3-2), ARC, Shillong (2-0), DGAR (6-0) leh Arunachal SS (3-0) te an hneh vek - goal 14 khungin goal hnih chiah an chhuah.

Mizoram team hi March-a khelh tur Santosh Trophy Final Round atana inbuatsaih mek an ni.