Manipur-ah Aizawl FC vanduai

I League champion lai Aizawl FC-in Inrinni khan Manipur-ah Neroca an hmachhawn a, goal awm loin an inhnehtawk.

Mizo club hian league match nga chhung chak hmel an hmu tawh lo a, match 13 aṭangin point 17 an hmu a, palinaa awm Mohun Bagan chu khelh zat inangah point liin an la pha lo.

Vanduaina
Aizawl FC-in defender pathum chu inhliam leh hrem vangin an inlan thei lo. Centre back zinga chhawr theih awm chhun Masih Saghani pawh Afghan a nih avangin Manipur lut turin Protected Area Permit a mamawh a, PAP hi Zirtawp zanah nei chauhin inkhelh ni chawhma lamah Guwahati aṭangin inkhelhna hmun tur a pan.

Portuguese coach Paulo Meneses-a'n loh theih loin Masih bul a ṭantir a, Alfred Kemah Jaryan chu midfield aṭangin defence-ah a pawt let. Khuman Lampak Main Stadium-ah mualneitu aiin Mizo club-in ball an chang tam a, chance ṭha pawh an ngah zawk.

AFC midfielder David Lalrinmuana'n second half-ah goal a khung a, amaherawhchu goalline hma hreta lo ding S. Malsawmtluanga'n a khawih hram avangin offside vangin pawm a ni lo. Injury time-ah Leonce Dodoz-a'n chakna goal khung theihna hun ṭha nei mah se goal pawn lamah chiah a pet.

Aizawl FC-in goal chance ṭha bik an khung loh avangin an vanduai a, chutihrualin Neroca foreigner pahnih Nedo Turkovic leh Felix Odili Chidi te'n goal khungna hun ṭha an hloh ve tho. Neroca hian point thum an hmuh theih loh avangin hmahruaina hun ṭha an bawhpelh.

Result dang
Tilak Maidan-ah Churchill Brothers-in Dawda Ceesay hmangin minute 11-na lekah hma hruai mah se injury time-a Abhijit Sarkar goal hnih hmangin Indian Arrows-in hnehna an chang.

Nimin tlai khan Chennai City-in Shillong Lajong an mikhual a, goal awm loin an inhnehtawk.

Aizawl FC Rs 3,00,000 chawitir
Nimin khan AIFF Disciplinary Committee, Kolkata-a ṭhukhawm chuan January 25-a RG Stadium-a Aizawl FC leh Mohun Bagan inkhelh bana fans chet mawi loh avangin Aizawl FC chu Rs 3,00,000 an chawitir.