A chung berah Mission Veng

Zirtawp zan Mizoram Super League final rematch-ah Mission Veng Vikings-in Khatla TBL 82-76 in an hneh a, champion lai Vikings hi semifinal lut hmasa ber an ni.

MSL4-ah Vikings-in Ronald March an ziaklut a, anni chiah hi state pawn player nei an ni. Chutih rualin semifinal thleng turin Mission Veng hian American player March-a puihna an mamawh lo a, Mizo hlangin match thum khel tawhin an la chak vek.

Vikings tan Moses Zoremmawia (26 pts), Michael F. Lalawmpuia (23) leh Zonunsanga (16) te an che ṭha a, Mizo hlanga champion tum Khalta TBL hneh hi inchhuanna tham a tling.

Khatla erawhin Mizo hlanga an el pui tura ngaih Zarkawt BCA an hneh tawh lo a, Vikings an hneh lo leh hi mualphona a ni.

Vawi hnih champion tawh TBL hian an player thar Vanchuangpuia (21 pts), Lalliansanga (13) leh Lalṭhazuala (10) te an chhawr chungin Vikings lakah phuba an la thei lo a, coach leh player ni kawp H. Laldinsanga (Mapuia) awm loh a lang zelah a ngaih theih.

MSL hi naktuk zan hian khelh chhunzawm a ni dawn a, Zarkawt BCA leh kai thar Republic VR4 te an inhmachhawn ang.