MCL Auction neih a ni

Mizoram cricket inelna ngaihhlut ber Mapuia Cricket League chu March 1 hian khelh ṭan a ni dawn a, Zirtawpni zan khan player an lilam.

LPS Studio-a player lilamnaah hian club parukin player lei nan Rs 164, 500 an seng a, season hmasaa sen zat Rs 213,100 an phak lohna chu Rs 48,600 a ni.

MCL khel tur chiang sa Chanmarians CC, Chhinga Veng CC, Kulikawn CC, Ramhlun Venglai CC leh Zarkawt Lords ten an player neihsa 10 ṭheuh an chelh theih avangin auction-ah player langsar an tel lo a, hei hian sum sen a tihniam - kumina player manto ber chu Henry Lalsangzuala niin Zarkawt Lords chuan Rs 9,000-in an lei.

Zarkawt Lords chu auction-naa sum inseng hnem ber niin Rs 46,500 an seng a, player lei hnem ber niin 10 an lei bawk. Chanmarians-in sum an hmang tlem ber a, Rs 13,000 an seng.

Kumin MCL-ah club thar CrOM CC kan hmu dawn a, anni hian hmun ruak awm chu chhang huai berin Rs 58,000-in MCL khel tur hian an inlei tling.

Mapuia Cricket League champion hmasa ber chu Kulikawn CC an ni a, kum hmasa pahnih an champion nghal. Kum thumnaah Ramhlun Venglai an rawn lang a, he mi hnu hian Chanmarians chu kum zawnin an champion a, anni hi nomawi kawltu an ni.

MCL-ah vawi thum champion thei an la awm lo a, Chanmarians CC leh Kulikawn CC te chu rahbi thar kai thei dinhmunah an ding a, amaherawhchu tualchhung cricket inelna sang ber Mahuma Cricket Memorial-a champion Chhinga Veng CC leh team dang pathum Ramhlun Venglai CC, Zarkawt Lords leh CrOM CC ten thlentir an phal lo ang.