Real chakna Ronaldo hattrick

Sawiselna karah Cristiano Ronaldo-a'n a zia a chhuah leh ta–Portuguese forward hian Inrinni zan khan hattrick a siam a, Real Sociedad lakah Real Madrid chu 5-2 in hnehna a chanpui. Mikhual team Sociedad tana Jon Bautista leh Asier Illarramendi te goal khungin awmzia a nei lo.

Atletico Madrid-in pahnihna dinhmun sawhnghet turin hnehna an chang ve bawk a, an mikhualna ramah Malaga chu 1-0 in an hneh–Atletico tana goal khungtu chu tudang ni loin Antoine Griezmann bawk a ni.

Ronaldo = 3
Ronaldo-a'n Champions League-ah group match tina goal khung vek thei awmchhun ni turin record a siam a, goal kua a khung tawh. Mahse, La Liga lamah erawh Ronaldo-a'n beisei a phak lo a, kum thar hmaa La Liga lama a goal khung zat chu goal li chiah a ni.

Real chet chhiat chhanah Portugal captain-in kawh rawn a hlawh a, tunah erawh a zia tak tak a chhuah leh ṭan ta–minute 27', 37', 80-ah te goal a khung a, a match hnuhnung pali aṭangin goal sarih a khung leh tawh! Spanish top flight-a hattrick a siam zat chu 33 a ni ta chiah bawk.

Inbuatsaihna ṭha
Real Madrid-in Nilaini zanah Paris Saint-Germain chu Champions League last 16-ah an hmachhawn dawn a, European champion nih bak tun season atana beisei tur nei tawh lo Real tan chuan Sociedad laka an result hi inbuatsaihna duhawm tak a ni.

Ronaldo bakah hian Lucas Vazquez chuan minute khatna lekah goal hmahruai a khung a, Toni Kroos chuan goal khat a khung ve bawk–Real boss Zinedine Zidane chuan, "Minute khatna leka goal khung chuan engkim a awlsam tawh a, Nilaini zan kan inkhel tur atana inbuatsaihna ṭha tak a ni," tiin a sawi.