Champion tur City-in goal nga an khung

Manchester City-in Premier League champion an hnaih zel a, Inrinni zan khan Etihad Stadium-ah Leicester City chu 5-1 in an sawp a, Sergio Aguero chuan second half-ah goal li a khung.

Pep Guardiola chuan Burnley nena hnai taka hlahtu Raheem Sterling chu ring nawn leh ngatin English winger hian minute thumna lekah goal a khung nghal. Foxes-in Jamie Vardy hmangin minute 24-naah sut mah se second half-ah Aguero-a goal li a khung a, Argentine forward leh a club khelhna City an ropui.

Aguero hian Etihad Stadium-a a zawnin match sarih chhung goal a khung vek a, heng match atang hian goal 14 khungin match hnuhnung pathumah chuan hattrick vawi hnih a siam. Argentine striker hian Alan Shearer, Thierry Henry (vawi 5) leh Harry Kane te hnung zuiin Premier League-ah season li chhung chu a zawnin goal 20 a khung tling a, tun season-ah goal 21 khung tawhin Liverpool forward Mohamed Salah a nih rual a, Tottenham strker Kane (23 goals) chiah a pha tawh lo.

City goal hmasa pathum hi midfield-a game tidiktu Kevin de Bruyne siam vek a ni a, Belgian midfielder hian tun season league-ah vawi 14 assist a nei a, amah hnaih bertu Leroy Sane (10 assists) pawh a khelhpui tho a ni. Riyad Mahrez pawh Etihad Stadium-ah hian a inlan a, amaherawhchu City a pan a theih tak loh avangin Leicester kawr hain minute 62-naah a rawn lut a, club pahnih ṭantuten an lawm ve ve.

Man City manager Pep Guardiola chuan, "Kar liam taa Burnley kan khelh ṭum nen khan kan khelh dan a inang viau a, tun ṭuma kan danglamna erawh kan chance neih goal-ah kan chantir a ni," tiin a naute a fak.