Saron an tlo, Durtlang an vannei

RFL Plastics MFA Futsal League quarterfinal chu Zirtawpni zan khan khelh zawh a ni ta. Saron Vengin first leg-a an chak tawhna hmang ṭangkaiin Armed Veng South an hneh a, Durtlangin penalty hmangin Electric Veng an hneh ve bawk.

Semifinal first leg hi naktuk zan hian R. Dengṭhuama Multipurpose Hall, Mualpuiah khelh an a ni dawn. Zan dar 7:00-ah Chanmari leh Durtlang an inkhel ang a, 8:30-ah Chhinga Veng leh Saron Veng te an inhmachhawn leh ang. February 16, Zirtawpniah semifnal second leg khelh a ni ang a, final hi February 23-ah khelh tur a ni.

Penalty hmangin
Electric Veng leh Durtlang te first leg-ah 3-3 in an inhnehtawk a, second leg boruak a san phah. Durtlang tan Lalfelkima'n minute lina lekah hmahruaina a khung a, Electric Vengin K. Lalhmuchhuaka hmangin second half minute 36-naah an sut chauh.

Durtlang bawkin minute 43-naah Isaac Malsawmtluanga hmangin hma hruai nawn leh mah se second tam a ral hmain Electric Vengin an sut leh a, goal a luh belh tawh lo. Penalty-ah Durtlang keeper Lalhruaizela chu chhandamtu a ni a, goal khatmah chhuah loin man of the match-ah thlan a ni.

Saron an ṭang tluan
Armed Veng South-in thawhchhuah tumin C. Lalbiaksanga hmangin minute 15-naah hma an hruai a, first leg-ah 4-2 a an chak loh avangin an siphurh sut kim turin goal khat dang an la mamawh. Amaherawhchu Saron Veng tan goal khung khawl Lalremtluanga'n goal hnihin a chhang let a, AVS tan thawhchhuah ngaihna a awm ta lo.

Second half-ah AVS tan Lalmawizuala Colney-in a pet goal a, he goal hi second leg bika an siphurh sut nan tawk mah se semifinal thlenna a ni pha lo. Inelna ṭan hmaa rinkai ni pha lo Saron Veng Marema goal khung theihna hmangin an kal zel a, final lut turin an ṭhenawm Chhinga Veng an hneh a ṭul ang.