Lewandowski-a'n Heynckes record a nihrual

Bayern Munich striker Robert Lewandowski chuan amah enkawl mektu manager Jupp Heynckes record a nih rual a, Inrinni zan khan German champion hi Schalke lakah 2-1 a hnehna a chanpui.

Heynckes chuan 1972-73 season khan Borussia Monchengladbach tana a khelh laiin season tir lama anmahni muala Bundesliga match 11 an khelh hmasakah goal a khung vek a, he a record duhawm tak hi Lewandowski-a'n a rawn nihrual chiah.

German manager Heynckes kaihhruaina hnuaiah Bayern hi an che ṭha tluang hle a, tunah hian a zawnin match 12 chhung hnehna an chang tawh. League match 22 khelh aṭanga point 56 hmuin point 18 zetin an sang fal zawk tawh a ni.

Inkhel dangah Michy Batshuayi a langsar chhunzawm zel, Chelsea aṭanga loan hmanga Borussia Dortmund pantu hian a club thar tana a match hnihna khelin Hamburg lakah goal khat a khung a, Dortmund tan hian Marco Reus chuan goal khat dang a khung bawk.

Belgium international striker Batshuayi hian inkhelh tam a duh avangin Bundesliga club a zawm a, match hnih a khelh aṭangin goal thum a khung bakah assist vawi khat a nei tawh bawk.