Zarkawt BCA an chak kim vek Vikings hmabak Tuikual South

Mizoram Super League champion lai Zarkawt BCA chuan season 6 kal laiah pawh team ṭha bik an nihna an lantir a, league match vawi nga an khelhah hnehna chang vekin table hmahruaitu an ni chiang hle.

BCA hian Zirtawpni zan khan Chanmari Vikings chu 77-68 in an hneh a, team paruk inlan zinga an khingpui zawng zawng an hneh vek. Tunah chuan hahdam takin semifinal-a an khingpui tur an nghak veng veng tawh.

Chanmari Vikings hian zanin dar 7:30-ah season hmasa finalist Tuikual South an hmachhawn leh dawn a, team pahnih tan an league match hnuhnung ber a nih tawh dawn avangin an dinhmun ti chiangtu a ni nghal bawk ang.

Zarkawt BCA hian an player pawimawh Malik Price Martin an chhawr thei tawh lo, American player hi tun laia hri leng mek coronavirus vangin a haw. Martin tel lo mah se Lalrina Renthlei an la nei a, Punjab tlangval Sahaj R. Patel an la nei bawk.

MSL Most Valuable Player (MVP) nilai Lalrina'n Mission Veng Vikings a nih laia a khelh tawhna club hlui lakah zahngaihna a lantir lo. Tuikhuahtlang guard hian point 33 a neih bakah rebound vawi riat a la. An match hnuhnung zawka Chawnpui BC an hneh ṭumin triple double (29pts, 13reb, 10ast) a lo nei tawh bawk.

BCA coach Lalruatfela (Afela) chuan, "Player kan kim tak loh avangin a harsa dawn tih kha chu kan hre nghal, mahse player inlante kha an inpumkhat sawt a, huaisen taka an beih avangin kan chak," tiin Vikings an hneh hnuah a sawi.

MSL6 season kal laia player mal khaia hmuhnawm bera chhal ngam chu Raymond Miller Jr. a ni. American tlangval hi champion lai BCA lakah pawh a mikhual lo, point 31 a neih bakah rebound vawi 18 lain double double a nei.

Tualchhung basketball tihmuhnawmtu Raymond hi khel ṭha thawkhat mah se Chawnpui laka a chet ang (53 points) chu a phak lo a, player dang lak aṭanga thlawpna a hmuh ṭhat tawk loh bawk avangin chak nan a tawk zo lo.

Vikings coach H. Lalhruaitluanga chuan, "Tun laia hri leng vangin inkhel boruak pawh a nung thei lo, tun ṭumah pawh khan ka naute kha ka fuih phur zo ngang lo niin ka hria, quarter thumna kan khelh laia tihsual kan ngah kha kan tuar ta a ni," a ti.

Zanin Inkhel Tur

Chanmari Vikings    07:30 PM    Tuikual South

March 17, Thawhlehni

Ramhlun Sporting Club    07:30 PM    Khatla TBL

Thlirna Tawi

Chanmari Vikings 68 - 77 Zarkawt BCA

QTR    1    2    3    4    TOT

VKS    21    13    12    22    68

BCA    15    22    23    17    77

Vikings

#    Player    Point    Rebound    Steal    Assist

1    Raymond Jr.    31    18    2    1

2    Zonunsanga    15    6    3    0

3    Lalruatkima Sailo    9    3    0    2

BCA

#    Player    Point    Rebound    Steal    Assist

1    Lalrina Renthlei    33    8    3    2

2    Sahaj R. Patel    11    16    0    2

3    Zonunsanga    11    9    3    4

Team Dinhmun

1    Zarkawt BCA    5    5    0    78    10

2    Chanmari Vikings    4    2    2    22    6

3    Khatla TBL    4    2    2    4    6

4    Tuikual South    4    2    2    1    6

5    Chawnpui BC    5    1    4    -61    6

6    Ramhlun BC    4    1    3    -44    5