Gladbach-in Europe an thlir zel

Zanin dar 12:00 hian Borussia Monchengladbach-in SC Freiburg hmachhawn turin Schwarzwald-Stadion an tlawh dawn a, Marco Rose hoten Europe-a football inelna sang ber Champions League khel turin beiseina an la nei sang hle. 

Gladbach hian point 56 hmuin palinaah an awm a, an chunga awm RB Leipzig leh Borussia Dortmund te point hnih leh point liin an pha lo. Chutihrualin Gladbach hi an hnuai chiaha awm Bayer Leverkusen nen point 56 ve ve an hmu a, Bundesliga-ah goal difference en a nih avangin palina an luah hram hram a tih theih bawk.

Borussia Monchengladbach hi Europe club ṭha zingah tel ve ṭan mah se club lian tana player ṭha chher chhuaktu club tiha sawi a rem zawk. Gladbach hian tlarhmaa Marcus Thuram, Alassane Plea, Lars Stindl leh Breel Embolo te an nei a, an hming hi chhinchhiah a ṭha ang.

Kum 22 mi Marcus Thuram hian goal hnih a khung a, tun season Bundesliga-ah goal 10 a khung tawh. Europa League leh DFB Pokal-a a goal khung nen goal 14 a khung tawh a, French forward hi 6 ft 4 in zeta sang a nih bawk avangin hmabak a nei êng hle. Liverpool leh Juventus nen pawh an sawi zawm mek.

Alassane Plea erawh kum 27 mi a ni tawh a, goal a khung theih bakah player fing tak ṭhiante goal khung tur siamsak thiam a ni a. French forward Plea hian goal leh assist vawi 10 ve ve a nei tawh a, Europe league lian panga zinga goal leh assist vawi 10 nei tling ve ve thei chu Bayern forward Serge Gnabry, Dortmund winger Jadon Sancho leh Barcelona forward Lionel Messi te chiah an awm.

Kum 31 mi Lars Stindl hi Germany tan pawh vawi 11 inlanah goal li a khung tawh a, tun season Bundesliga-ah goal ruk a khung. A tawnhriat hlu tak hi club tan a hlu a, Thuram leh Plea hnungah awmin goal nawr kawngah a ṭangkai hle.

Switzerland international Breel Embolo hi kum 23 mi a ni a, an ram club Basel-ah hming a lo chher viau tawh. Kum 2013 daih tawh khan FC Basel Young Player of the Year-ah thlan a ni tawh a, kum 2015-ah Swiss Footballer of the Year ni tawh mah se beisei angin a thawm a lian zui lo. Gladbach forward Embolo hian goal sarih a khung tawh a, amaherawhchu a ke rek hliam vangin Union Berlin leh Werder Bremen a hmachhawn thei lo a, tun ṭumah pawh a dinhmun a la chiang lo.

Gladbach hmachhawn tur SC Freiburg-in inelna ṭan a nih leh hnuah vawi li inkhel leh tawhin chak an la nei lo a, vawi hnih chakin vawi hnih dang an inhnehtawk.

Hemi a nih avangin hian Gladbach tan Freiburg hi point thum hmuh ngeina tur ti pawhin a sawi theih a, chutihrualin Freiburg hi an muala khel tur an nih bakah German forward Nils Petersen telna tih hriat a ṭha.

Borussia Monchengladbach hi an hming pum chu Borussia VfL 1900 Monchengladbach a ni a, August 1, 1900 khan an din. Vfl hi Verein fur Bewegungsspiele tihna a ni a, physical game club tihna a ni. 

German club hlun an nih angin Gladbach pawhin record ṭha an nei a, 1970s chhoh khan an vanglai hun an hmang. Bundesliga-ah vawi ruk zet an champion tawh a, European Cup-ah pawh 1976 - 77 khan final lutin UEFA Cup-ah vawi hnih an champion tawh.

Kum 1995 khan German Cup (DFB-Pokal)-ah a vawi thum nan an champion a, sum lamah an buai avangin club a tla chhe zui. Bundesliga club vantlang chunglam ni ṭhin kha, an relegate teuh ṭhin hle.

Kum 2004 khan Bokelberg stadium aṭangin stadium thar Stadion im Borussia-Park (Borussia Park) ah an insawn a, tun hnai kum 10 chhung vel chu club ṭha zingah an tel pha leh tawh bawk.