Newcastle hmaah Man United an tlawm

Alexis Sanchez, Anthony Martial leh Romelu Lukaku ten clear chance an hlah zanah Newcastle United midfielder Matt Ritchie chuan Manchester United lakah goal awmchhun a khung.

Pathianni zan inkhelah Rafael Benitez-a nauten an mikhual Man United 1-0 in an hneh a, St James' Park-ah Magpies hian nikum October thla hnua a vawi khat nan Premier League-ah hnehna an chang ve leh ta.

Jose Mourinho naute hian hmahruaitu Manchester City chu point 16 zetin an phak lo tawh a, Pep Guardiola naute hi an kaltluang zel a nih chuan April 7 zana United nen an intawn hunah nomawi an chawi thei tawh dawn.

Manchester khaw pahnih te hian an league match hmabakah tluang takin hnehna an chang chho thei zel a nih chuan, Etihad Stadium-a derby match an khelh hunah City tan champion turin draw bak a ngai tawh dawn lo tihna a ni!

Ritchie-a goal
Rafael Benitez-a'n United hneh tur chuan an thawhrim a ngai tih a chiang a, a bik takin a midfielder Jonjo Shelvey leh Ritchie te an tlan tam a, an mikhual player-te ball chang an hnaihchilh zung zung a, hmunawl an siamsak duh lo.

Minute 65-na a ni a, freekick aṭanga ball rawn kal zel chu Newcastle forward Dwight Gayle-a'n Ritchie tan pet nuam tawkin a lakthlak sak, box chhunga vengtu nei lo Scotland international hian keeper David de Gea dan hman lohin a pet lut–tun season league bikah goal khung tuma vawi 43 zet a pet hnuah a hlawhtling chiah.

Newcastle manager Benitez chuan, "Nidanga kan thawhrim ang bawkin kan thawkrim hle, chutihrualin Man United lakah chuan tihsual hlek kan neih chuan min hrem nghal dawn tih kan hria a, team hlauhawm tak laka kan inven dan leh beih let dan kha a ropui hle," tiin a nuate khelh danah a lungawi hle.

Spanish manager Benitez hian Mourinho lakah inelna hrang hrangah vawi ruk hnehna a chang chiah a, United manager laka vawi kua hnehna chang tawh Guardiola tih loah chuan record nei ṭha ber a ni.

Hmun harsa
Inkhel banah Portuguese manager Jose Mourinho chuan darkar 10 chhung inkhel pawh nise goal khung lo thei an nih thu a sawi. Mourinho chuan, "Newcastle khan an theihna zawng zawngin an khel a, an goal venhim theih nan khan nun hlan an ngam hial," tiin an khingpuite inpekna a dah sang hle.

United tan Arsenal aṭanga an lakluh Sanchez-a'n goal ruakah a khung lo a, French forward Martial goal khung tur chu keeper Martin Dubravka-a'n ṭha zeta a dan sak bakah, striker Lukaku leh Jesse Lingard te vanneih zan a ni lo bawk.

Mourinho chuan, "Goal awm loa kan inhnehtawk laia Sanchez-a goal khung loh te, hun tawp dawna Martial-a'n holam taka a hlah te kha a uiawm hle," tiin an hun ṭha neih a thamral thu a sawi. St James' Park-ah Mourinho hi Premier League match khelin vawi 14 a lenluhna chiah a ni a, chak ni hmel a la hmu lo.

Kum 55 mi Mourinho chuan sawi zawmin, "Freekick kan chawi a, chuta ṭanga ball rawn kal chu holam takin kan chhuah. An theihna zawng zawngin an khel tih chu kan hria, chutihrualin kan chak loh chhan erawh kan inven dik tawk loh vang a ni," a ti.

Manchester United hian Inrinni zanah FA Cup fifth round khel turin Huddersfield an lenchilh leh dawn a, Newcastle match leh hmasa ber tur erawh February 24 zanah Bournemouth nen league match an khel ang.