De Bruyne tan nomawi a ngai -Pep

Manchester City boss Pep Guardiola chuan a player pawimawh Kevin de Bruyne chuan Ballon d'Or chawimawina dawng tur chuan nomawi tam tak a chawi a ngaih thu a sawi a, a bik takin Champions League nomawi a mamawh thu a sawi.

Spanish manager chuan, "Kevin de Bruyne hian Ballon d'Or chawimawina dawng turin theihna a nei tih ka hria. Mahse, he chawimawina dawng tur chuan Champions League nomawi i chawi phawt a ngai a ni," a ti.

Kum 26 mi De Bruyne pawhin hemi chungchang hi sawiin, "Nomawi chawi ngei duhin he team tan hian theihtawp ka chhuah a, chumi piah lama mimal chawimawina chu ka tan chuan 'extra' chauh a ni tawh. Kan team khelh dan hian ka tan engkim a ti awlsam ve bawk a ni," tiin a ṭhiante a fak tel.

Ballon d'Or 2017-ah khan De Bruyne hi 14-na a ni a, Cristiano Ronaldo chuan a vawi nga nan a dawng. Real Madrid forward hi Lionel Messi nen vawi nga ve ve dawngin a dawng tam ber an ni a, 2007-a Kaka hnuah Ronaldo leh Messi hian an insem a ni ber.

Tun hnai kum 11 chhunga Ballon d'Or semchhuah vawi riatah chawimawina dawngtu chu Champions League nomawi chawitu zingah an tel.

City hian quadruple ( League Cup, FA Cup, Premier League leh Champions League) nomawi chawi turin beiseina an la nei mek a, zanin dar 1:15-ah hian Champions League last 16 match khel turin FC Basel an lenchilh ang.