East Bengal-in foreign referee an duh

Vawiin chawhnu dar 2:00-ah Minerva Punjab chuan East Bengal an mikhual dawn a, champion beisei team pahnih inthlauhna hi point ruk chauh a nih avangin Kolkata club chuan inkhel boruak sang zo tur foreign referee ruat turin AIFF hnenah an thlen!

East Bengal secretary Kalyan Majumdar chuan AIFF secretary Kushal Das hnenah lehkha thawnin, "Inkhel boruak san dan tur ngaihtuahin Indian referee tan he game hi thunun chi niah kan ngai lo a, awn lam bik nei loa inkhel an kaihhruai theih nan foreign match official hming ṭha takin he inkhel hi kaihruai se kan duh a ni," a ti.

Club pahnih hi an intawn hmasakin 2-2 in an inhnehtawk a, Kolkata club hian hnehna an chang zo lo a nih chuan club pahnihin match li chiah khelh tur an neih tawh dawn avangin Khalid Jamil-a naute tan champion beisei a harsa tawh ang.

East Bengal hi tun hnaiah an talbuai hle. Ivorian midfielder Armand Bazie chu an beisei a phak loh avangin an chhuahtir a, Bazie hian Minerva lam a pan nghal.

CFL-a Rainbow FC aṭanga hriat hlawh midfielder thlak tur hian EB-in Uzbek midfielder Dilshod Sharofetdinov an dawr nghal a, mah se Malaysian Premier League club Terengganu F.C. II player hi inremna an neihpui vek hnuah visa buaina avangin an lalut thei lo.

Nimin tlai I League inkhelah Mohun Bagan an tlawm a, Gokulam Kerala chu 2-1 in an ngam lo. Kolkata khawpuia inkhelah minute 76-naa Mahmood Al Ajmi goal khung chu minute hnih hnu lekah Aser Pierrick Dipanda-a'n sut mah se Kerala club hian Henry Kisekka hmangin minute 90-naah an khung leh a, Bagan champion beiseina an tihtawp sak.