Semifinal lut tur Zarkawt?

Mizoram Super League Season linaah Zarkawt BCA an la khel ṭha ber a, zanin dar 7:30-a kai thar Republic VR4 an hneh chuan semifinal an lut ang. Inkhelhna hmun tur hi Hawla Indoor Stadium, Republic Vengthlang a ni a, inkhel en man hi Rs 30 a ni.

Lalrina telna
Zarkawt BCA hian Lalrina Renthlei an lalut a, Tuitkhuahtlang tlangval rual hian Serpents aṭangin Lalsangkima, Chaltlang SC aṭangin Lalrosanga, Titans aṭangin C. Lalrinfela te an lakluh bakah Saron Veng star Lalrinkima an neih belh a, an lak thar ringawt pawh hi an ṭha tawk hle.

Lalrina awm hnuah BCA khel a mawi lehzual. Vikings champion puitu Lalrina hi Zonunsanga, Dennis Lalmuanpuia leh Matthew Sailo te nena an awm ho bawk avangin an buk a rit hle. Zarkawt hian MSL la chawi lo mah se tun season-ah vawi hnih champion tawh Khatla TBL leh Tuikual South te an hneh tawh. Mizo hlang chuan anmahni ang bawka la chak vek Mission Veng ai pawhin an ṭha zawk a, hemi tichiangtu chu Vikings thiampuipa Lalrina an chhuhsak thei hi a ni.

An insawp dawn!
BCA coach Lalruatfela chuan, "Chak kan duh a, ṭha thei ang bera khelh kan duh. VR4 hi MSL kai thar an nih avangin inthlahdah kan tum lo a, chiang taka kan chak thei a nih chuan chiang takin kan chak ang. Inthlahdah a thiang lo," tiin hnehna chan ngei an tum thu a sawi.

Zarkawt hian league round-ah chak loh a nei a nih chuan upset a thleng tihna a ni ber tawh a, chutihrualin February 21-a Mission Veng Vikings nena an inkhel tur erawh basketball ngainatute en châk a ni.

Upset zawk?
Republic VR4-in Mission Veng an bei tawk a, an coach Liansangpuia hian hun rei tak BCA a enkawl tawh avangin Zarkawt club hneh theih dan a awm a nih chuan chu thuruk chu hre tur a ni.

Amaherawhchu, coach Sangpuia tana harsa tur erawh VR4 hian chuai tawh lam leh ṭha tur an kawl tam a, vanglai hun hmang mek an kawl loh avangin chak theihna kawng khar hi a inhawng zim hle.

Chutihrualin infiamnaah chuan eng pawh thleng thei a ni a; Lianhmingmawia, Darliansanga leh Lalnunmawia Sailo te'n an tawnhriat an hman thiam a, inthlahrung miah loa player naupang zawk C. Lalchhandama, TC Lalnunmawia leh Lalpekhlua ten an theihna anga an khelh chhuah theih chuan upset thleng thei a ni thung.