Getafe-in Barcelona an dang

Barcelona chuan tun season La Liga match bika a vawi khat nan goal an khung lo. Pathianni zan inkhelah Catalan club hi an mikhual Getafe nen goal awm loin an inhnehtawk a, tun hnaiah a zawnin league match hnih chhung an chak zo ta lo a ni.

Barcelona hian point 59 neiin hmahruaitu an la ni tho mah se tun hnaia a zawna vawi thum hnehna chang thei Atletico Madrid nen an inkarah point sarih chiah a awm tawh. Diego Simeone naute hian March 4 zanah Nou Camp an tlawh ang.

A goal lo
Nou Camp-ah ṭum dang angin Barcelona goal nawr a na tawk lo a, hun chanve chhungin an khingpui goal zawnah an pet thei lo a, hetiang hi a thleng zen zen lo! April 2012 khan league-ah Real Madrid mikhualin Barca hian first half-ah goal zawnah an pet lo.

Second half-ah Lionel Messi leh Philippe Coutinho ten hun ṭha an nei a, mah se Getafe keeper Vicente Guaita an paltlang zo lo. Guaita hian nipui trasfer thlen hunah Premier League club Crystal Palace chu free transfer-in a zawm dawn.

Tun hnaia khel ṭha thei tak Luis Suarez pawh a vannei bik lo, Uruguay international hian ṭha zetin volley lut mah se offside vanga pawm a ni lo a, a hnuah offside vang bawkin a hun ṭha neih a thamral bawk a ni.

Ernesto Valverde-a'n danglamna thlen beiseiin, Coutinho leh Paco Alcacer te la chhuakin Andres Iniesta leh Ousmane Dembele te a dahlut a, mahse an mamawh goal an nei thei chuang lo.

January transfer-a Palmeiras aṭanga Barca zawmtu defender Yerry Mina chuan a vawi khat nan Catalan club tan a inlan a, goal venhim kawngah a thawk ṭha a, Colombian defender hian goal khung theihna tur hun ṭha a neih erawh goal pawnah chiah a tauh.

Mikhual Getafe tan Vitorino Antunes chuan hun tawp hma hretin yard 30 aṭangin freekick ṭha zetin a pet a, Barca keeper Marc-Andre ter Stegen chuan a lo nam chhuak hram a, corner petna hun pawh awm tawh loin inkhel a tawp zui.

A la him lo
Barcelona coach Ernesto Valverde chuan an kut ngeia La Liga nomawi an chawi hma chuan inthlahdah theih an nih loh thu a sawi a, a naute khelh danah lungawi lohna a nei hran lo bawk.

Kum 54 mi Valverde chuan, "Kan league khelh lai hi a awlsam lo tih kan hriat nawn a ngai, awlsam taka hnehna chan theih a nih loh zia min hmuhtir thei team tam tak an awm a ni," tiin a sawi.

Spanish manager chuan an tlarhnung sawi zawmin, "Tlarhnung laiah Yerry leh Digne ten ṭha takin an khel dun thei a, senior player awm loh karah pawh rintlak an nihna khan min tilawm hle," a ti.

Valverde hian a player hliam dam hlim Dembele chuan beisei angin la khel chhuak rih lo mah se hun rei lote chhunga a insiamrem a beisei thu a sawi bawk.

Barcelona hian February 21-ah Champions League khel turin Chelsea an tlawh dawn a, chumi hmain Inrinni zan hian Eibar an tlawh ang.