Chi inthliarna do turin player kan pawimawh Kimmich

George Floyd thihna vangin khawvel hmun hrang hrangah chi inthliarna duh lohna lantir an tam a, footballer zingah pawh hma la an awm nual. Bayern Munich midfielder Joshua Kimmich chuan player tinin mawhphurhna an neih thu a sawi.

Bundesliga player zingah chi inthliarna duh lohna lantir an awm a, an zingah hian Borussia Dortmund forward Jadon Sancho pawh a tel. Mihang Floyd chungah rorelna dik thleng se an duh a, mihangte chuan an dikna chanvo hmuh ve an duh bawk.

Germany international Kimmich chuan, “Footballer kan nih chuan mawhphurhna hrang hrang kan nei, ka ngaihdan chuan chi inthliarna titawp tur pawhin nasa taka hma la thei leh zirtirtu kan ni thei bawk.

“Kan thu sawi leh chezia hi midangin an thlir reng a, entawn tlaka kan nun a ngai. Khelmual chhungah chuan tupawh inen hranna a awm lo, ṭhian leh lamṭang vek kan ni, kan khingpuite pawh kan hmelma an ni lo a, elpui an ni ve mai,” tiin inenhranna a duh lo thu a sawi.

German Football Association chuan chi inthliarna thlawp leh thlawp loh chungchangah chuan player-te chu an duh anga kal a phalsak a, chutihrualin football dan leh hrai an neih sa pela an che a nih erawh chuan dan pangngaiin hremna an hmachhawn theih thu an sawi bawk.