Ranji-ah Saurashtra an champion

India rama tualchhung cricket inelna sang ber Ranji Trophy-ah a vawi khat nan Saurashtra an champion. Inelnaah hian regional leh state cricket association-te an tel a, tun ṭumah hian team 38 telin Mizoram pawh a vawi hnih nan an inlan.

Saurashtra Cricket Association Stadium, Rajkot-ah mualneitu coin toss-ah an vannei a, bat hmasak an thlang. First innings-ah Saurashtra hian run 425 an siam a, Bengal-in run 381-in an chhanglet. Second innings-ah Saurashtra-in run 105/4 an siam tihin ni nga khelh tur a zo a, an inhnehtawk.

Amaherawhchu Ranji Trophy danah first innings-a che ṭha zawk chu chak zawka puan tur a nih avangin Saurashtra an champion. Bengal erawh an vanduai - vawi 14 final an luh tawhah vawi hnih chiah an la champion.

Inelna hi March 9-13 chhung khelh a ni a, Saurashtra top order an che ṭha. HM Desai (38), Avi Barot (54), VM Jadeja (54) leh AV Vasavada (106) te zarah an dinhmun a ṭha a, khawtual tlangval Cheteshwar Pujara-a'n run 66 a siam. Saurashtra hian run 425 an siam a, champion turin an dinhmun a ṭha.

Bengal opener-ten bul ṭan ṭha tawk lo mah se middle order lamin beiseina an rawn siam. SD Chatterjee (81), MK Tiwary (35), Wriddhiman Saha (64), AP Majumdar (63) leh Arnab Nandi (40) te hmangin run 381 an siam a, amaherawhchu first innings-a Saurashtra an phak loh chuan nghawng a nei lian. Saurashtra bowler Dharmendrasinh Jadeja-a'n wicket thum lain (114/3), captain Jaydev Unadkat (96/2) leh Mankad (45/2) ten an thlawp ṭha bawk.

First innings a zawh hi chuan champion tur a chiang ti tih tawh a, captain Unadkat-a'n Bengal an vawm hlum zawh hian lawmin field-ah a tlan kual. Second inningsh-ah Bengal bowler ten Saurashtra an vawm hlum kim hman lo a, a vawi khat nan Saurashtra an champion.

Kumin final hmain tun hnai kum 10 chhungin Saurashtra hian vawi hnih final an lut a, Mumbai lakah an tlawm ve ve. Tun ṭumah erawh Saurashtra hun a thleng a, an mualah ngei nomawi an chawi.

Saurashtra captain hlui leh coach Sitanshu Kotaka chuan, "Unadkat leh Pujara tih loh kha chu Ranji-a player pangngai an ni a, chuvangin kan champion hi team thawhrah liau liau a ni," tiin a sawi. Pujara chuan, "Ranji nomawi hi ka tan hian a pawimawh takzet. Ka pa pawhin Ranji Trophy a khel tawh ṭhin a, a tan pawh kan nomawi hi a hlu. Saurashtra chhunga cheng zawng zawngin inrintawkna an neih phah ang," tiin vawi khat champion-na hlut zia a sawi.