Olympic Quarterfinal-ah Osaka a lut

Japan nula, hmeichhe tennis world number 2 ni bawk Naomi Osaka chuan Tokyo Olympic 2020 neih laiah third round a inhlang kai a, quarterfinal-ah chuan Marketa Vondrousova leh Mihaela Buzarnescu inkhela chak zawk a hmachhawn ang.

Nimin chawhma lam khan Ariake Tennis Park-ah Osaka hi a inlan a, a khingpui Viktorija Golubic chu 6-3, 6-2 in a sawp - Swiss nula hneh tur hian darkar khat leh minute nga bak hun a mamawh lo.

Grand Slam vawi li champion tawh Osaka hi Olympic hma khan chawlh kar riat ngawt a chawl, inkhel loa a chawlh chhan hi rilru lam harsatna a neih vang a ni - infiamna khawmpui lianah erawh hlim hmel a pu ve leh ta.

Kum 23 mi Osaka chuan, "Keimah vangin kan ram puanzar hi chawi sanin awm ve ngei se tih hi ka duhthusam a ni ṭhin, chutiang tur chuan kum riat chhung chu ka lo nghak tawh a, beiseina nen ka lo thlir reng ṭhin.

"Kan ramah ngei tihhlawhtlin theihna remchang a inchhawp mek a, bawhpelh loh hram ka tum ang," a ti. Olympic zawhah US Open pawh khelh a tum thu a sawi, nunphung pangngai a zawh leh thei tawh dawn niin a lang.

Olympic-ah hian world number 1 Ashleigh Barty chu a match hmasa berah a lo tla tawh, tunah chuan ranking sang leh mipui ṭan hlawh Osaka hi champion tura rinkai ber a ni mek, a hmabak erawh a la hautak dawn.

Inkhel dangah Garbine Mugu-ruza leh Anastasia Pavlyuchenkova te pawhin an khingpui ve ve hnehin quarterfinal an in vaw kai ve bawk a, player ṭha pahnih hi Osaka dang thei tur zinga mi an ni ang.

Spain nula, Grand Slam vawi hnih champion tawh Muguruza hian Chinese player Wang Qiang chu 6-3, 6-0 in a hneh, darkar khat leh minute khat bak hun a hmang lo. Russian nula Pavlyuchenkova pawhin Germany aiawhtu Anna-Lena Friedsam chu 6-1, 6-1 in a hneh.