German coach ṭha ber Thomas Tuchel

Thomas Tuchel-a'n Chelsea tana Champions League nomawi a chawi man a hmu zel - German chanchinbu lar Kicker leh Association of German Sports Journalists chuan season hman zawh taka German coach ṭha berah an thlang.

Award hi German journalist-ten vote hmanga an thlan a nih avangin ngaihhlut a hlawh a, Chelsea boss Tuchel hian he award dawng tur hian Bayern Munich boss kal chhuak ta Hansi Flick leh Borussia Dortmund boss Edin Terzic a khum.

Kum 47 mi Tuchel hian January thla tawp lam khan Chelsea a zawm a, English club hi a season hmasa berah Champions League nomawi a chawipui nghal - award a dawn hma hian Blues-ah contract thar a lo hlawh chhuak tawh bawk.

Tuchel chuan, "He award hi team aiawhin lawm takin ka dawng a, mimal hnathawh vanga he chawimawina hi dawng thei niin ka inhre lo," a ti a, a hlawhtlinna chu team thawhhona ṭhat vang a nih thu a sawi.

German coach of the year chawimawina hi German mi coach leh Germany-a football coach hna thawkte pual a ni a, Dutch coach Louis van Gaal chu German mi ni lo zinga he chawimawna dawng awmchhun a ni - kum 2010 khan Bayern Munich boss ni chungin a dawng.

A sang ber Tuchel
German journalist rual 559-in an ram mi zinga coach ṭha ber thlanna an neihah hian Tuchel-a'n coach ṭha ber anga ngaitu mi 129 zet a nei a, amah hnaih bertu Flick-a'n vote 118 a hmu.

Nikum lama German coach of the year-a thlan Flick hian Bayern Munich chu Bundesliga-ah a champion pui a, tunah erawh Germany national team coach a ni tawh.

Season tawp thlenga Dortmund coach lailawk hna chelhtu Terzic chu pathumna niin vote 75-a hmu a, kum 38 mi coach hian DFB-Pokal ah Dortmund chu a champion pui a ni.

Bayern boss thar Julian Nagelsmann chuan vote sarih hmuin RB Leipzig boss hi pakuana a ni phak hram a, he chawimawina ṭum thum lo dawng tawhtu Liverpool coach Jurgen Klopp chuan vote thum a hmu ve hram!

Zinkawng ngaihnawm
Tuchel-a'n professional coach a nih hnua a vawi khat nan Coach of the year chawimawina a dawng a, German coach ṭha bera thlan a nih theih nana a zinkawng hi ngaihnawm a tling.

Borussia Dortmund boss hlui hian Paris Saint-Germain tan hna ṭha tak a thawk chungin rin a hlawh lo a, December 2020 khan French club hausa hian a hna aṭangin an chawlhtir.

January 25-ah Chelsea-in an coach Frank Lampard an ban a, a tirah Tuchel hi an duh nghal bik lo - coach lailawk tura sawm Ralf Rangnick-a'n Blues sawmna a hnar avangin Tuchel lam an hawi.

Tuchel-a'n PSG-ah nomawi paruk chawia Champions League final hial a luh avangin coach lailawk tura sawm chi a ni lo a, Blues lam hian hlauthawng tak chungin thla 18 atan contract an ziahpui.

Hlawh hmu tlak
Chelsea-in Lampard an ban hian Premier League-ah pakuana an ni a, an league match hnuhnung pariatah vawi hnih chiah an chak bawk - hlauthawng chunga lakluh Tuchel-a'n a hna a ṭan zui.

German coach hian a match hmasa berah goal khung loin Wolverhampton Wanderers chu inhnehtawkpui mah se an khelh dan avangin Blues fan-ten beiseina thar an nei a, an beisei sual lo.

Chelsea-in inelna hrang hrangah match 14 zet chu a zawnin tlawm an nei lo zui a, pakuanaa bul ṭan Tuchel-a'n league-ah palina niin Blues hi season a kharpui a, Champions League nomawi a chawi bawk.

London club-in contract hmangin Tuchel-a chungah lawmthu an sawi zui a, German coach hian kum 2024 thleng cham turin contract a ziak thar -season thara a team din dan tur hi Blues fans tam tak chuan an hmu châk leh tawh khawp ang.