Lewy-a'n chawimawina a dawng leh ta

Bayern Munich striker chhuanvawr Robert Lewandowski chu Germany footballer of the year atan thlan a ni a, vote tla 563 aṭangin vote 356 zet a hmu.

Polish striker chhuanvawr hian chawimawina dawng tur hian Bayern Munich tana a khelhpui Thomas Müller leh Borussia Dortmund striker Erling Haaland a khum.

Kum 32 mi Lewandowski hian season hman zawh takah khan Bayern tan inelna hrang hrangah match 40 khelin goal 48-a khung a, assist vawi kua a nei bawk.

A sang fal
Lerwy-a'n vote 356 a hmu a, vote tla zat 563 aṭanga chhut chuan 63.23% a tling a, amah hnaih bertu Muller hian vote 41 a hmu - player pahnih inthlauhna hi a sang veng veng hle.

Kum 31 mi Muller hian season hman zawh takah khan match 46 khelin goal 15 a khung a, assist vawi 24 a nei thung. Player pahnih hian season hman zawh takah khan Bayern tan Bundesliga nomawi an chawi.

Germany-a season tluan hun a hman hmasak berah Erling Haaland chu pathumna a ni a, Norwegian striker hian season hman zawh takah khan inelna hrang hrangah match 41 khelin goal 41 a khung a, assist vawi 12 a nei.

Lewy a ropui
Lewandowski-a'n season hman zawh takah khan league match 29 aṭangin goal 41 tehmeuh a khung a, ropui tak a ni - Gerd Muller-a'n 1971/72 season-a goal 40 khunga Bundesliga season khata goal khung hnem ber record a lo siam tawh chu a khum.

Lewy chuan, "Ka tan chuan chawimawina ropui tak a ni," tiin a award dawn chungchang a sawi a, Bayern president Herbert Hainer, CEO Oliver Kahn leh board member for sport Hasan Salihamidžic te chuan an striker chhuanvawr lawmpuina thu an sawi bawk.

Polish fifth division club Delta Warsaw aṭanga a career ṭantu Lewy hian Bayern tan a career-ah match 329 khelin goal 294 a khung a, assist vawi 65 a nei bawk - Chelsea nen sawizawm mek ni mah se a chhuah a rinawm loh zawk.