US Open khel tur an hraw

August thla tawp aṭangin US Open khelh a ni dawn. Grand Slam pali zinga a hnuhnung berah hian mipa singles player ṭha pathum - Roger Federer, Rafael Nadal leh Novak Djokovic te an tel thei dawn niin inelna buatsaihtu lam chuan an sawi.

Tennis season kal laiah - Australian Open, French Open leh Wimbledon an khel tawh, heng inelnaah hian Djokovic a champion vek. Wimbledon-ah Nadal a inlan lo a, tunah chuan a ṭha pathum hi hard court chhungah an inel leh dawn ta.

Serbian tlangval Djokovic hi tunah chuan Tokyo Olympic khelin Japan ramah a awm mek. Mipa player dangin an la tih theih loh 'Golden Slam' nih a tum mek - a hmabak erawh a la hautak dawn.

Olympic gold medal a la thei a nih pawhin US Open a la hmabak dawn, New York khawpuiah hian Olympic khelh laia lo hahchawl Federer leh Nadal an inlan ve leh tawh dawn a, nomawi chawi a harsat sawt ang.

World number 1 hlui Andy Murray chu a ranking a hniam (104) avangin main draw atan a tling lo. Inelna buatsaihtu lam hian Britain tlangval hi a inkhel thei dawn a nih chuan wildcard pek an hreh lo ang tih a rin theih.

Flushing Meadows (US Open khelhna) ah hian mipa bakah hmeichhe player langsar pawh an inlan dawn. Tun dinhmunah chuan Olympic khel thei lo Simona Halep-i'n inlan a tum thu a sawi tawh, ani bakah hian Garbine Muguruza pawhin hming a pe lut tawh bawk.

Season hmasa khan hri leng vangin US Open hi stadium khatin entu an awm thei lo, kuminah erawh a tir aṭangin stadium chhunga ṭhutna awm zat ang zelin a hmunah entu an awm thei tawh dawn a ni.