Sumit Nagal beiseina a tawp

India tlangval tennis khel thiam, ram mipuiin beiseina nena an thlir Sumit Nagal tan Tokyo Olympic 2021 chu a tawp ta. Nimin zing khan Nagal hi world number 2 Daniil Medvedev lakah a chak lo.

Ariake Tennis Court 1-a inkhekah Medvedev hi kawng tinrengah a chungnung, darkar khat leh minute ruk chhungin 6-2, 6-1 in hnehna a chang - Nagal tan Russian star hi a la u hret a ni.

Chak lo mah se Nagal hian mellung pawimawh erawh a phun ve tho. Zeeshan Ali (Seoul 1988) leh Leander Paes (Atlanta 1996) te hnuah, India tlangval zinga Olympic singles match-a hnehna chang thei hmasa a ni.

A match hmasa lamah Nagal hian Uzbekistan aiawhtu Denis Istomin chu 6-4, 6-7(6), 6-4 in a lo hneh ve tawh a ni. Hmeichhe doubles player Sania Mirza leh Ankita Raina te ṭang dun erawh hneh nei loin an tla.